*Asina e mandatario a enfatiza!
ORANJESTAD (AAN) – Diaranzon mainta a tuma lugar e conferencia di prensa di gobierno, den cual Minister di Husticia y Asunto Social, señor Rocco Tjon, a hiba palabra.
E dignatario a reacciona tocante e imagennan cu a circula Diamars cu a pasa, relaciona cu un incidente cu a sosode den un crèche specificamente, y el a expresa cu Gobierno y su persona, como Minister di Asunto Social, ta condena e actonan aki.
“No ta por nada, nos ta inverti masha hopi mes pa combati abuso di mucha en general, y obviamente imagennan cu nos por a wak ayera ta condenable.
Pa e momento aki, na momento cu esaki a yega na nos conocemento nos a actua mesora. E imagennan aki, mi ta enfatiza, no ta algo cu a sosode ayera. Esaki tabata conoci caba pa algun siman cerca nos, y Departamento di Hoben y Mucha a actua mesora tambe den colaboracion di Cuerpo Policial, Jeugd en Zeden Politie pa ta exacto, y pa e motibo ey tambe tin diferente detencion a tuma lugar, den e caso specifico aki”, Minister Rocco Tjon a declara.
E mandatario a subraya cu ta hopi importante pa laga e investigacion cana su caminda, y obviamente, despues di full e proceso un Huez lo dicidi kico ta e castigo cu lo wordo duna.
“Mi kier reacciona tambe riba diferente ponencia cu tabata circula ayera, cu Gobierno y Minister di Husticia y Asuntonan Social, lo no a haci nada pa combati abuso di mucha. Y mi ta kere, sigur despues di e Luna di April, cu a wordo decreta como e Luna cu nos ta duna mas atencion ainda na esaki, por a bira bisto pa un y tur kico tur ta wordo haci, e ultimo añanan. Nos a enfoca hopi riba e parti di maneho; riba e parti di legislacion ya caba pa algun aña e adaptacionnan a wordo haci na unda a aumenta e castigo pa e diferente tipo di delitonan, y ademas di esey tambe, aworaki semper bo por keda entrega bo denuncia si acaso bo a wordo abusa y mi kier sa esaki ta un paso hopi importante”, Minister Tjon a señala.
