ORANJESTAD (AAN) – Señor Bob Angela, miembro di e Comision di Chauffeurnan di Autobus,
den entrevista cu DIARIO a expresa cu e reunion cu Minister di Transporte a bay den bon atmosfera y el a expresa cu e chauffeurnan di autobus ta duna e minister un aplauso, pasobra nan a hinca algo den otro, na un manera profesional y e documento ta hopi bon presenta.
E tema di e reunion cu e dignatario tabata e vestuario, cu nan mester uza 'bermuda short' cu ta baha te e rudia, pasobra no por uza slof. Pues, pa e chauffeurnan ta presentabel.
Angela a subraya cu e tabata un reunion informativo unda no a papia nada di cambionan di ley, pero solamente pa laga nan sa cu nan ta 'vergunninghouders', du nan ta mara na voorwaarden y tur esey ta prescribi den ley.
El a subraya cu e por a compronde for di e minister y su departamento, cu esnan cu no ta atene na ley mester busca otro cos pa haci, pasobra den bida ningun hende por ta riba ley, y esun cu viola ley, mester prepara su mes pa e consecuencianan.
Tocante e cantidad di asientonan cu mester tin den e servicio di transporte publico aki, Angela a comenta cu e ta contento cu dia 1 di October ta bin control, y cu ley ta bisa cu maximo ta 11 stul, plus 1. Esaki pa inclui e asiento di e chauffeur.
E reglanan ta stipula caba y nan a traha un linea recto pa tur hende bay den e mesun direccion. El a agrega cu mester bin mas reunion pa trata otro temanan. Por ehemplo, nan a haya permiso pa aumenta e tarifa cu un florin, pero e florin aki a muri na caminda caba pasobra e costo di bida a bira hopi halto.
Bob Angela ta kere cu gobierno (minister di transporte) lo manda un carta na tur chauffeur, unda lo indica kico ta consecuencianan pa esnan cu no ta cumpli cu e ley.
