ORANJESTAD (AAN): Recientemente DIARIO a publica extensivamente riba e problema cu ta wordo crea na Palm Beach, tanto dilanti e Hotelnan grandi, y tambe na Eagle Beach, cerca di e planta di RWZI na Bubali.
Esey ta debi cu lo tin algun Restaurant of Bar, of Hotel den e zona cu intencionalmente ta djis basha azeta, grease den labaplato, siendo cu nan no tin un ‘grease trap’ instala na e negoshi.
Tur e azeta aki ta basha bay cu awa sushi di labaplato den e sistema di riolering, y ta crea obstaculo, produciendo holor stinki, y ta pone awa sushi sali for di e riolering y basha riba caya. Pasobra e tuberianan ta bira blokea.
Awor a bin sali na cla, cu e casnan di e compleho di Sero Patrishi cu algun aña pasa tambe a wordo poni riba sistema di riolering... ta pasando den mesun situacion.
Siman pasa den oranan di mainta, DOW a wordo informa cu e riolering na Sero Patrishi a bay over, y debi na esey tin un holor desagradable den e bario.
Tecniconan di DOW y demas experto a bay mira e situacion, y ora cu a habri e tapaderanan pa check, a bin descubri cu aki tambe sushi/vet di azeta y grease a acumula, y esaki a pone cu e tuberianan a plok.
DOW a bay duna asistencia, pero a indica cu e situacion di mantenimento aki ta cay bao di Fundacion FCCA cu ta encarga cu e casnan aki, y cu a paga pa instala e riolering. Pues FCCA tin di bay bin cu campaña y alerta cada habitante eynan cu nan tin di stop di basha azeta sushi y grease den labaplato of wc y kere cu e lo “desaparece” sin problema.
Aki por mira con diki e vet cu grease ta keda acumula den un di e bakinan di riolering, y pesey claramente demas liquido di otro casnan no por sigui pasa.
