Gregory Fung-a-Fat di United Farmers Aruba:
ORANJESTAD (AAN): Gregory Fung-a-Fat di United Farmers Aruba a duna di conoce cu mayoria di hende por a ripara cu e parti di agricultura ta sigui. Ta haciendo tur loke por haci bao di tur e situacionnan.
El a bisa cu pa loke ta gobierno, hopi cos a wordo papia pero cu poco reaccionnan su tras. Akinan ta papiando di cosnan cu a wordo palabra den e MoU mes cu a wordo firma aña pasa y no a yega na mesa. Como organisacion nan ta trahando pa purba riba nan mes contacta Elmar, WEB, DIP pasobra nan ta ripara cu si sigui pusha riba e parti di minister e ta trancando.
"Y nos ta laat. Nos a pasa den Covid, nos a ripara cu nos ta laat caba y si nos sigui den e rumbo cu nos ta bayendo e sector aki, sector primario ta bay wordo perhudica", a remarca.
Segun Fung-a-Fat, aworaki cu e habrimento di e frontera maritimo cu Venezuela a ripara cu na lugar di cantidad kier cantidad. El a agrega cu na Mei ultimo tabata tin un conferencia cu participacion di e islanan y por a wak cu Corsou tin plannan caba cu nan ta proteha e productornan di nan isla.
A splica cu si no tin esey e agricultornan di Aruba no lo por sobrebibi. Na Aruba kier bin cu hopi rekisito, pero ta habri frontera y ken ta controla? E ora ey ta midiendo cu dos diferente midi locual no ta husto, a bisa.
Ta hincando hopi esfuerzo y hopi placa den e sector aki y gobierno ta papia di yuda sector primario pero ainda e placa no a wordo mira, Gregory Fung-a-Fat a duna di conoce.
Nan a bay dilanti pa loke ta e hendenan cu ta produci na Aruba, pero si ta bay wak kico mas lo tin cu haci e ora tin hopi pa haci, a indica.
Aworaki tin un miho bista di esnan cu ta produciendo y kico. "Santa Rosa tambe ta haciendo un esfuerzo, nos como organisacion ta haci esey", a agrega.
A sigui bisa cu e tarifa cu como agricultor nan ta pagando ELMAR, ta e tarifa mas halto cu ELMAR tin. "Bo ta haya esey ta un sosten pa sigui produci?" WEB a duna di nan parti y nan a baha e tarifa di awa y awor ta bezig cu ELMAR. Pero sa cu no ta facil.
Eynan ta unda ta haya cu gobierno tin un rol pa hunga y e rol ta cu si nan ta compromete nan mes, mester actua y no solamente papia, Fung-a-Fat a expresa.
Awendia esnan cu ta comercialmente activo den mundo di agricultura ta rond di 6, a bisa. No ta hopi, pero nan ta consumi basta coriente. A sinta cu ELMAR na mesa. A papia cu Utilities, cu Minister Geoffrey Wever, Minister Croes, tur hende, pero tur ta bisa cu nan ta bezig cu ne. "Pero nos ta laat". Si e bezigheid ta 6 luna, un aña, nos no tin e tempo ey. Pero si nos ta bisa cu nos kier proteha e calidad y e ora ey nos ta un tiki leu fo'i otro", asina e representante di United Farmers Aruba a termina bisando
