Parlamentario Kamperveen ta informa:
ORANJESTAD (AAN) – Parlamentario Raymond Kamperveen, di fraccion di RAIZ hunto cu e Comision di Transporte Publico, tabata tin un reunion cu e gerencia di Arubus, compania di cual gobierno ta cien porciento doño.
E Comision tabata interesa na haya sa con e situacion den e compania ta y kico nan ta preparando, por ehemplo, cu Aruparking cu ta cay bao di Arubus, con leu nan ta pa cuminza ya cu tin yen di propaganda ta sali publica. El a wordo informa cu si tur cos bay bon, dia 1 di Mei Aruparking ta cuminza draai.
Kamperveen a menciona cu nan a haya full un presentacion door di e director hunto cu su profesionalnan cu a splica tur e situacionnan cu tin den e compania.
E parlamentario a expresa cu pa ta sincero, e ta kere cu mesun preocupa e pueblo eyfo ta cu transporte publico, pasobra tin hopi critica pa busnan cu no ta na tempo, rutanan cu no ta wordo cori mas, cu a wordo para, anto tur e preguntanan aki a bin afo, dilanti di e Comision.
E parlamentario a indica cu Arubus tabata tin contesta pa tur cos, pero e pregunta ta, kico nan ta bay haci basa riba e informacion aki?
“Loke nos ta bay haci como Comision ta, yama Minister Ursel Arends aden, como minister di transporte pa wak kico ta su vision, su plan, pa e aña aki ainda, pa Arubus”, Kamperveen a comenta.
El a agrega cu tin filanan di pasahero parti atardi ora cu nan kier bay cas despues di trabao, si ta bay den direccion di Green Corridor of Watty Vos Boulevard, e trafico ta pega, y no tin un solucion.
E parlamentario a bisa cu si wak bon, nan no a planea ora di traha Watty Vos Boulevard pa tin un linea special pa bus pasa bay. Tempo cu nan a traha WVBlv y Green Corridor, nunca a traha un express lijn pa bus, pa e por ta na ora den cada parada, pues segun schedule. Si un pasahero perde e bus e tin cu warda entre 1’or pa 1 or y mey. Pa loke ta e congestion den trafico Raymond Kamperveen ta kere cu a yega ora pa transporte publico duna un miho servicio pa pueblo, pasobra prijs di gasoline ta subi y baha regularmente, y hopi no por afford un auto, pues pa esnan cu no tin auto transporte publico ta especial.
