Minister di Finansa ta preparando pa presenta e 'Nota di comienso di aña' 2024

*Lo informa Parlamento riba e cambionan den presupuesto 2024

ORANJESTAD (AAN):  E siman aki Minister Maduro di Finansa a reuni cu Departamento di Finansa pa asina repasa e detayenan di locual ta bira e 'Voorjaarsnota' of 'Nota di Comienso di Aña' den cual Parlamento na comienso di aña caba ta wordo informa di e cambionan den Presupuesto 2024.

          Na aña 2023 tabata pa prome biaha cu Minister Maduro di Finansa a haci entrega di un Nota di Comienso di Aña na Parlamento. Te cu aña 2022, conoce un 'Najaarsnota,' un 'Nota di Fin di Aña' den cual Parlamento despues di mitar aña ta wordo informa di e cambionan den Presupuesto. Basa riba e 'Nota di Fin di Aña' Gobierno ta presenta un Presupuesto Supletorio den cual ta pidi Parlamento aprobacion pa e cambionan si esaki ta necesario.

          Pa duna Parlamento un bista mas tempran di e cambionan necesario den e Presupuesto di Pais Aruba, Minister di Finansa a introduci un 'Nota di Comienso di Aña' pa prome biaha na aña 2023. E Nota aki lo keda presenta den e promer mitar di aña y esaki tambe lo por wordo compaña pa un Presupuesto Suppletorio pa pidi Parlamento aprobacion pa e cambionan. E ultimo aki ainda mester keda dicidi pa Conseho di Minister.

          Cu e introduccion di e 'Voorjaarsnota' of 'Nota di Comienso di Aña' den e ciclo presupuestario di nos Pais, Gobierno ta brinda Parlamento informacion presupuestario na mas momento den un aña. Esaki sigur ta yuda e derecho di 'budgetrecht' di Parlamento di Aruba y ta brinda mas transparencia na Pueblo riba con e fondonan publico ta keda uza pa Gobierno.