ORANJESTAD (AAN): Lisette Gomes di Fundacion Mi Voz Ta Bo Voz (FMVTBV) ta splica cu
awe ta bay cuminsa cu e charlanan rond Aruba encuanto Abuso di Mucha. El a indica cu den cuadro di e luna di conscientisacion riba abuso di mucha.
Relaciona cu esaki FMVTBV ta dunando informacion di nan actividadnan. Awe diahuebs ta cuminsa cu e prome charla. Ta bay tin 4 charla na e diferente MFAnan rond di Aruba.
Gomes a bisa cu ta bay cuminsa na MFA Noord y ta haci un yamado na comunidad di Aruba pa acudi. E charla aki ta hopi importante. Ta bay tin Melva Croes-Yanez, neuropsicologo y Audrey Khan, psicologo cu ta specialisa den trauma pa papia riba kico abuso ta causa na un mucha, no solamente e momento ey, pero pa bida largo.
Ta bay tin informacion hopi valioso pa conscientisa comunidad riba e efecto di abuso di mucha, a remarca.
Tambe ta bay tin Magaly Maduro, directora di Bureau Sostenemi pa papia riba kico e fundacion ta haci y kico ta e situacion na Aruba ora ta trata e casonan aki, di cual tin hopi caso grave di diferente tipo di abuso na Aruba, principalmente e casonan di abuso sexual.
Ta hopi importante pa comunidad forma parti di e charlanan aki pa asina ta consciente di kico e consecuencianan ta, pero tambe riba pa identifica e señalnan, a splica.
Lo conta cu presencia di Omaira Britten, ken ta skirbi poesia y e lo declama un poesia relaciona cu e tematica aki.
Pa diabierna lo pidi comunidad di Aruba pa bisti na blauw como un acto simbolico. E color blauw ta wordo uza pa conscientisacion riba abuso di mucha rond mundo. E luna aki, Gobierno di Aruba a decret'e oficialmente como luna di prevencion y conscientisacion. Esaki ta pa pone mas enfoke no solamente pa e luna di April pero henter aña.
E charka di awenochi lo ta na MFA Noord di 7 pm pa 9 pm.
