Minister di Enseñansa & Deporte a bishita Abraham de Veer School riba 'Dia di Respet'

ORANJESTAD (AAN): Siman pasa Minister Endy Croes tabata presente na San Nicolas en conexion cu Dia di Respet organisa pa Abraham de Veerschool.

Pa diescinco aña caba e scol ta organisa e actividad aki cu e meta pa inculca respet den e alumnonan, e importancia pa tin respet propio y con pa trata otro cu respet.

Tema di e actividad e aña aki tabata multicultural cu ta refleha e diferente culturanan di e alumnonan cu ta atende e scol. E alumnonan a forma un ekipo y a usa nan creatividad pa presenta e lokaal decora den e tema y color di e pais cu nan ta representa. Tabatin un total di diestres presentacion di diferente pais manera; Aruba, Colombia, Republica Dominicana, Sint Maarten, Haiti y Corsow. 

‘E tabata un mainta colorido yena cu energia, historia, tradicion, cultura, cuminda crioyo, bebida y baile di diferente pais cu a keda presenta pa e alumnonan’, e mandatario a expresa.

Minister Endy Croes kier gradici directora di scol sra Jane Bueno Guzman-Hooft pa e invitacion y e caluroso recepcion. Alabes ta felicita tur e alumnonan pa haci e Dia di Respet uno exitoso. Minister ta felicita e klasnan ganado!