Minister di Economia ta kere den e potencial di Oranjestad

*Aunke e ta conciente cu tin hopi reto pa sobrepasa

ORANJESTAD (AAN) — Minister di Economia, Comunicacion y Desaroyo Sostenible, señor Geoffrey Wever, a expresa den entrevista cu DIARIO, cu e ta kere den Oranjestad, aunke e ta conciente si, cu tin hopi reto ainda pa sobrepasa.

            E mandatario a bisa cu p’esey, ora el a drenta den gobernacion el a puntra si e por ta encarga cu e  parti di Oranjestad.

            “Mi ta kere den e potencial di Oranjestad, mi ta kere den e oportunidad pa nos inversionistanan, primordialmente esnan local, y desde cu mi a bira minister mi a purba diferente proyecto scuchando stakeholders pa pusha e desaroyo di Oranjestad.

            “E no ta algo cu gobierno so por haci. Gobierno mester haci esaki cu partnership di sector priva, y esey tabata e vision ‘all along’. Tur e proyectonan cu nos ta haciendo ta den consulta directo cu sector priva, y ohala for di principio nos tabata tin mas fondo, y por a haci mas”, e dignatario a indica.

            El a sigui bisa cu, cu e ta purba cu e fondonan cu tin haci proyectonan real, tangible, y no solamente bin cu palabranan bunita, pero set up un vision y ehecuta esaki.

            “Ora bo wak kico nos a haci na Wilhelminastraat, e tabata den dialogo cu e restaurantnan, cu comerciantenan y nos a set up un vision, busca arkitecto, fondonan, y nos a ehecuta e proyecto”.

            El a comenta bisa cu e mester ta mas y mi ta di acuerdo. E mester ta mas, pero esey tabata e fondonan cu tabata tin na e momentonan ey, y nos a inverti nan den diferente otro proyectonan den mesun forma, y awe mi ta wak hopi hende cu ta inverti pero tambe hopi partner di gobierno cu nos ta den partnership cu nan, manera Monumenten Fonds Aruba. “Nos a rescata Cas Veneranda, cu mi ta kere ta un edificio hopi importante na Wilhelminastraat, cu pa añanan, mas cu 20 e tabata un ruina. Un  di nos monumentonan di mas bunita, y ta jammer pa wak un di e edificionan asina bay atras, y den partnership cu Fondo di Monumento, nos a rescata esaki”, Minister Geoffrey Wever a bisa.

            E mandatario a reitera cu e kier un partnership cu sector priva, y e ta aprecia e trabao cu nan ta haci. “Mi sa cu inverti den un ciudad manera Oranjestad, na e momento aki, no ta facil y tin hopi reto. “Mi ta kere mas tanto retonan comercial, financiero, y nos mester percura pa tin mas fluho di hende. Esey ta parti di e partnership aki cu nos mester percura pa mas hende bin den centro di Oranjestad”, e dignatario a remarca.