Grandi y chikito a bay mira e Dress A Child Event di Old Skool Bikers

ORANJESTAD (AAN): E organizacion di Old Skool Bikers na Aruba, a cuminza como un grupo chikito di amigonan riba Harley cu sa reuni y

cu despues a dicidi uni nan deseonan pa haci algo pa comunidad, y tambe pa demas gruponan di Harley.

   Den nan trabao di bondad, a escoge pa duna un man na e organizacion di Women’s Club of Aruba, y a prepara un actividad di Car & Bike Show cu nan a yama ‘Dress A Child’, cu ta e campaña di Women’s Club tambe.

   Esaki a ser teni recien riba caminda paralelo di Lloyd G. Smith Boulevard dilanti agencia Yrausquin, for di 11’or di mainta te cu 7:30’or di anochi.  Animacion musical tabata den man di DJ Jeff, Robert Thiel y su Happy Band, grupo di pop/rock Skale, grupo Haerfen, y ‘N Fuzion.

   Un cantidad grandi famia a acudi na e actividad aki pa asina mira cantidad di Bikes, y tambe por a mira show di Mustang Club of Aruba, y tambe Muscle Cars Aruba.  Tabatin 3 cushina y varios Bar cu a yuda den e evento aki, y e rifa pa un Harley Davidson Dyna ainda por wordo cumpra cerca miembronan, como cu e sorteo lo ta dia 1 di December 2024.