Minister di Cultura contento cu reapertura di e cuater museonan cu a cera durante periodo di Covid-19

Cu hopi gratitud pa APA, ATA y FMA:

ORANJESTAD (AAN) – Minister di Cultura, señora Xiomara Maduro, den entrevista cu DIARIO a señala cu e ta hopi contento ya cu aworaki, Fundacion Museo Arubano, a logra den cooperacion cu ATA y APA, haci reapertura di e cuater museonan di nos pais.

            E cuater museonan aki mester a cera durante e periodo di Covid-19, loke sigur tabata un momento hopi duro, y na unda a mira con e Fundacion cu tin e responsabilidad pa maneha e museonan aki (FMA) a purba di tur manera pa por tene cabes riba awa, pero door cu e fondonan necesario no por a yega na tempo, esaki a trece cune cu poco, poco mester a limita e operacion te na momento cu nan a cera.

            “Di parti di gobierno nos a busca tambe avenida pa por a wak con nos por habri e museonan atrobe, den otro format y otro manera di financia pero si a percura pa e coleccionnan keda bon asegura y bon conserva y asina a sigui traha cu MFA, pa por logra e dianan aki, pa locual nos ta gradici APA y tambe ATA, pa nan contribucion enorme, pasobra aworaki nos por cuminza bek cu un plan pa e aña aki, pero tambe e añanan nos dilanti, p’asina, no solamente pueblo di Aruba, pero tambe e turistanan por bin y sera a conoci cu locual ta di nos cultura y historia”, e mandatario a señala.

            Minister Maduro a agrega cu invitacion ta keda pa esnan stakeholders den comunidad pa bin hunto y wak di ki manera FMA por tin un cooperacion, hunto cu nan, na bienestar di Pais Aruba.