Minister di Asuntonan Social a priminti di sigui traha na beneficio di nos muchanan

ORANJESTAD (AAN): Diahuebs mainta na Centro pa Hoben y Famia a tuma lugar un conferencia di prensa, relaciona cu e Siman di Lantamento di Mucha y e Dia Internacional di Derecho di Mucha, cu ta 20 di November.

Durante e conferencia di prensa minister di Husticia y Asuntonan Social Rocco Tjon a duna un palabra di pabien na tur e profesionalnan cu t haciendo un tremendo trabao na e centro cu awor a cumpli 1 aña di existencia.

“Ta asina cu e edificio aki practicamente ta e simbolo caminda cu bo ta wak e cooperacion entre e departamentonan, unda cu literalmente tur e organizacionnan ta sinta hunto y ta brinda e ayudo necesario den cuadro di e topico aki”, segun Tjon.

El a sigui bisa cu na 2018 a introduci e Siman di Lantamento di Mucha.

Segun e mandatario, 32 aña pasa lidernan mundial a tuma un decision na Asamblea General di Nacionnan Uni, caminda cu hunto nan a dicidi cu nan kier bay proteha bienestar di tur mucha por medio di un tratado.

Na 2001 Aruba tambe a firma e tratado aki y na mes momento a instala un comision pa percura cu e tratado aki por wordo ehecuta na un manera corecto.

“E comision di derecho di mucha ta consisti di 8 organizacion gubernamental y 2 organizacion no gubernamental”.

Tambe a instala un Task Force pa derecho di mucha na 2014 cu ta traha den Reino y ta netamente riba 20 di November 2018 tambe un  MoU a wordo firma pa sigui fortifica e partinan aki y pa enfatiza tambe e importancia cu derechonan di mucha mester tin, segun e minister.

El a splica cu den e siman nos dilanti tin hopi actividad pa nos muchanan planea, pa nan por goza.

Segun Tjon, banda di e actividadnan aki ta bay crea tambe concientizacion riba kico e derechonan di mucha ta.

No solamente pa e muchanan, sino tambe pa e mayornan.

“Di parti di Gobierno nos lo haci tur cos posibel pa mas y mas brinda e cursonan necesario na e instancianan cu ta haciendo e trabao aki y tambe atravez di maneho y cambionan di ley nos lo sigui haci nos esfuerzo pa pr brinda mas proteccion na nos muchanan”, segun Tjon.