ORANJESTAD (AAN) – Diamars mainta durante un conferencia di prensa na AZV, convoca pa Minister di Turismo y Salud Publico, Dangui Oduber, a elabora tocante e recorte di 5.5% den cuido medico cu Hulanda a impone riba Aruba.
Presente den e conferencia tambe tabata Director di AZV Ir. Edwin Jacobs, Dr. Joel Rainherc, Director di ImSan, Jacco Vroegop, Director di Hospital dr. Horacio Oduber, y señora Gina Maduro, presidente di e Sindicato ABV.
Nan a duna informacion tocante e tema asina importante, manera e paro na e recorte di 5.5% riba cuido medico.
Minister di Salud y Turismo Dangui Oduber a cuminza bisando cu e ta contento cu e hecho cu por fin lo duna bek e 5.5% di recorte riba cuido medico, cu a wordo impone riba Aruba, ora cu e pandemia a cuminza na aña 2020.
E dignatario a acentua cu no tabata facil ora cu e pandemia a haci su entrada na Aruba. Ta conoci cu Aruba ta un di e paisnan cu mas a wordo afecta economicamente door di e pandemia, y pa sobrebibi nos pais mester a haci un prestamo na gobierno di Hulanda di 916 florin.
“Ora cu bo haci prestamonan ta bin condicionnan cu no ta tur ora bo ta di acuerdo cu nan y cu ta dificil pa cumpli cu nan. Un di e condicionnan cu a wordo poni na momento di a haci e prestamo, tabata cu nos mester a haci un recorte riba cuido medico di 60 miyon florin, algo cu nunca nos tabata di acuerdo cune, y semper nos a diferencia di opinion cu Gobierno di Hulanda riba esaki”, Minister Dangui Oduber a bisa.
E mandatario a señala cu despues di temponan hopi dificil pa e sector di cuido, nan tampoco, obviamente, tabata di acuerdo cu e recorte di 60 miyon, ni cu e recorte di 5.5% cu a drenta na vigor ya caba na 2020, y nan lo a keda coresponde cu gobierno pa wak ki tempo gobierno lo por kita esaki, y no tabata facil pa nos yega na e dia di awe.
“Na comienzo di aña 2023, nos a dirigi un carta na AZV pa e aña aki nos para e recorte di 5.5% miyon aki, y nos a pidi AZV conseho y traha riba diferente escenario, pa asina yega na e decision cu nos a yega awe, cu entrante Luna di Mei nos lo para e recorte di 5.5% aki”, e dignatario a señala.
