Na November 2023 e ta cumpli oficialmente cuatro aña
*Vacuna pa mucha vulnerabel ta prueba di responsabilidad
*Calidad di bida y hasta di soño di hende afecta pa e malesa
ORANJESTAD(AAN)—Cuanto hende realmente awe ta pashent di Covid-19?
Mundo a cambia y te awe ta sinti efectonan di e Coronavirus nobo cu segun prueba cu cientificonan tin, na November 2019 ya tabata presente na mundo y a cuminsa reclama su victimanan.
“2019 novel coronavirus” tabata e prome nomber cu a resona den publicacionnan mundial mientras mundo a cuminsa prepara pa e asalto di loke a bira oficialmente e malesa COVID-19.
Cuanto hende mundialmente a haya e enfermedad y cuanto a muri ta dificil pa bisa te awe na un mundo cu a wordo confronta cu un malesa desconoci, cu paso a paso, mientras e ta avansa, te awe ta splica hende, kico e por haci.
Kico mas e por haci ta informacion cu ta sigui wordo compila pa asina por actua y sigui actua teniendo cuenta cu e realidad cu ta e persona mas fuerte tin e chens mas grandi pa sobrevivi.
Vacuna y e resistencia crea dor di infeccion anterior (imunidad) ta haci cu awe bida ta parce di ta sigui su curso sin cambio, aunke esaki no ta berdad.
Kende ta sufri di e resultadonan di Covid-19? Kende hasta tin Covid? Dificil pa bisa te na momento cu hende realisa cu e tin un problema y e dicidi di busca yudansa medico, si e no haya su mes confronta cu un atake di e virus, cu ta haci cu e mester bay hospital of den basta caso ainda, enfrenta morto.
E cantidad di casonan pisa y morto a baha considerabelmente, pero ainda tin basta hende cu ta biba cu resultadonan serio of menos serio di e virus.
E calidad di bida y hasta di soño di hende, ta wordo influencia dor di e virus. Hopi hende cu tabata subi cama pa cera wowo te mainta, awor tin problema pa drumi.
Segun expertonan medico a conclui, casi 50 porciento, mitar di e totalidad, di hende cu a haya e virus, tin problema pa drumi.
Tin indicacion cu na cierto paisnan grandi, 70 porciento di hende a keda cu un problema cu ta resultado di e virus.
Mientras tempo ta transcuri mas y mas hende ta cuminsa lubida cu un dia nan a mira morto nan dilanti ora nan a wordo asalta pa e virus.
Na momento cu nan presenta na dokter, e dolor leve ora kier hala rosea of e sentido di cansancio, ta topa cu e pregunta di dokter, si e persona en cuestion por a haya Covid of hasta por tin Covid.
Trahadornan ta acudi na dokter pasobra nan ta experencia “nubia” den nan mente. Nan ta sinti cu nan ta perde contacto cu mundo, mientras e berdad ta cu nan tabata den contacto cu Covid-19.
Hende ta reacciona contento cu na Merca a wordo anuncia cu ta retira tur medida di Covid-19. Na mes momento, paisnan cu tin placa y cu conoce desaroyo, ta prepara pa otro shot di vacuna pa hende cu tin un edad mas halto cu 60.
Na Aruba un paso grandi a wordo tuma pa habri caminda pa mucha vulnerabel, pues cu mas chens pa bira victima, di e malesa, cu nunca a desaparece.
Pa Gobierno tuma medida cu ta forsa hende tene na regla, mientrastanto no ta posibel pasobra e leynan cu a haci posibel pa Gobierno exigi hende keda cas, ya no ta existi.
Pero e peliger a keda atras mientras cifranan ta indica cu un parti grandi di mundo no a vacuna. Cu na paisnan caminda hopi hende a haya Covid, inmunidad natural tambe ta enemigo di e virus.
Esaki ta nifica cu Covid-19 a pasa pa pasado?
Mester scrap e cifra 19, cu ta papia di 2019 ora Covid a drenta como ladron di bida di hende.
Pero te awor pa loke ta trata coronavirus, ta e segundo caso di e siglo aki cu a conoce e prome Coronavirus na inicio di Siglo 20.
Bida ta sigui na un mundo cu mester adapta su vacuna.
Medidanan ta stop di existi. Awor e regla ta simplemente cu esun cu mas forsa, mas resistencia, tin mas chens di sobrevivi un atake di Covid-19, cu e persona cu un problema di salud.
E malesa ta keda un menasa di morto sigur pa e hende vulnerabel, cu tin mas chens di bira victima di su atake.
Mientras ta pone fin na medidanan nacional, e responsabilidad ta keda na cada hende pa vacuna nan mes y mucha inocente cu ta core riesgo di bira victima.
