Aruparking a elimina tur hoki geel y no ta usa klem mas

Parkeo cu pago ta bek na Playa

• Awor por paga cu cierto Debit-Card tambe
• Encuestanan cu 85% pueblo kier parkeo regula 

ORANJESTAD (AAN): Estudio- y encuestanan haci a produci un señal fuerte!  Como 85% di poblacion na Aruba, den encuesta a mustra cu nan ta di acuerdo cu mester bin parkeo regula, unda ta paga pa bo staciona auto.  Como cu 93% di comerciantenan a opina cu parkeo tin di wordo regula den forma unda tin ordo, mobilidad, y control.

   Tur esey ta loke Gobierno a tene cuenta cune, y a traha pa asina introduci cambionan necesario y lanza bek e servicio di Aruparking na Aruba.

   Desde Diamars 2 di Mei 2023, ya e sistema di Aruparking ta “on” na Aruba.  Durante un conferencia di prensa, Ministro Ursell Arends a indica cu den e cambionan grandi cu a wordo haci, ta cu a elimina tur hoki geel cu antes tabata reserva pa abonadonan.  Y tambe a elimina awor e temible ‘klem geel’ cu Parkeerwachters tabata mara na wielnan di auto di esnan cu nan ta gara ta violando parkeo.

   Tambe a cambia e sistema cu pantaya y boton na cada mashin di Aruparking, den e sentido cu awor ademas di paga cu moneda, bo por paga tambe cu Credit Card, of tambe Debit Card local di Aruba Bank of Banco di Caribe.  Por paga tambe cu e sistema di Pay.aw y corda cu parkeo ta valido di 9:00 am te cu 7:00 pm.

   Aruparking y su futuro: Diamars atardi durante un conferencia di prensa convoca pa Ministro Arends, den presencia di representante di Raad van Commissaris di Arubus NV, y tambe Director y Managernan di Aruparking cu tabata presente, el a anuncia e epoca nobo di AruParking.

   Debi na e Landspakket, un estudio ‘Doorlichting’ a wordo haci door di seis compania estatal, di cual Arubus NV ta uno di nan, tambe PWC Nederland, y den e estudio aki a bin claramente dilanti cu Aruparking tin derecho di existencia, y un di e puntonan cu a discuti riba dje tambe cu CAft tabata cu Aruparking den futuro lo wordo saca for di Arubus NV, y haci’e un compania riba su mes y cu por genera su mesun entradanan.  Asina e lo no pone peso financiero mas riba Arubus.

   Lo no tin klem mas: Ministro a splica cu AruParking ta cuminza funciona bek, y a elimina tur hoki geel.  Aña pasa Aruba a sobrepasa e cantidad di 90.000 vehiculo, y aworaki na playa tin 1.651 hoki di parkeo obtenible.  Tur hoki geel a wordo elimina y a converti den hoki blanco, pues tin mas espacio pa tur hende.

   E klem geel awor ta algo di pasado!  E lo no wordo usa mas na 2023, pero lo bay tin un otro sistema di controla esnan cu ta violando regla di parkeo.  Tur automobilista cu comete infraccion, na prome instante lo haya un sticker.  E di segundo infraccion, lo e haya cantidad di dia pa paga e ‘boet’.  Si acaso bo keda sin paga esaki, lo bo ricibi un boet entrega te na bo cas.  Si bo keda sin paga, e ora lo start proceso di ‘incasso’ contra e doño di auto.

   Tin 440 hoki gratis tambe: Gobierno ta pensa riba esnan cu cu no por paga pa parking.  Pesey a crea un total di 440 hoki gratis pa staciona na Playa.  Esaki ta comparable cu 28% di tur espacio di parking disponible na Oranjestad.

   Como 236 hoki gratis lo ta ubica den e parti panort di Parada di Arubus (patras di Aruba Trading).  Tambe full rond di ciudad a pone 24 hoki gratis poni pa adultonan mayor, dama na estado, y tambe personanan cu tin cualkier forma di disabilidad.  Nan tin di contact cu Aruparking pa haya mas informacion y ricibi aceso.  Demas parking gratis ta riba Lloyd G. Smith Boulevard.

   Tarifa di ‘Stop & Go’: Pa tur automobilista cu no tin necesidad di bay staciona mas cu 1 ora den centro di ciudad, bo por paga djis 1 Florin pa keda 30 minuut staciona.  Esey ta pa bo haci bo diligencia rapido, y despues sali bay lagando espacio habri pa otro hende.  Si bo kier staciona 1 ora, bo mester di paga 2 Florin e ora.

   Ultimo dianan aki, Aruparking tabata hopi ocupa ta reprograma e interface di e mashin di e compania, y tambe tabata haci reparacion na algun di nan, y riba Diamars ainda tabata restart algun di nan.

   Den otro articulo DIARIO lo menciona e sistema cu companianan y agencianan di Delivery por paga un suma special pa luna, pa haya e permiso BPV special pa e vehiculonan di Delivery aki.