Minister Dangui Oduber a entrega reconocimento na empleadonan di Divi Hotel

ORANJESTAD (AAN): Diaranson atardi Minister di Turismo sr. Dangui Oduber manera ta custumber a duna reconocimento na trahadornan di nos industria di turismo,

e biaha aki na empleadonan di e cadena di Divi hotel. Den un ambiente ameno cu a tuma lugar na Alhambra Ballroom e mandatario a duna e trahadornan nan certificado y plakaat pa e añanan di servicio cu nan a duna den nos industria mas importante.

Den e empleadonan cu a keda reconoci tabata tin cu a cumpli 5, 10, 15, 20 y hasta uno cu a cumpli 40 aña di servicio. Tabata momentonan bunita pa tende cu sr. Michael Alexander Maduro tabata ta un embahador di nos turismo desde aña 1982. Michael a cuminsa cu 18 aña di edad, como un bus boy, despues na 1984 e la ricibi un promocion y a bira asistente di waiter pa despues na 1987 wordo promovi pa waiter, cual posicion e tin te awendia. Esaki sigur ta inspira e trahadornan mas hoben pa sigui traha na un manera ehemplar pa nan futuro.

Minister Dangui Oduber ta manda palabranan di felicitacion y aprecio na tur e empleadonan di Divi Resort. Cada un di bosonan ta contrubui grandemente cu e sector turistico, brindando servicionan di calidad na nos bishitantenan. Minister Oduber ta bay sigui brinda e tipo di reconocimentonan aki na nos embahadornan turistico, paso nan ta e weso di lomba di e industria importante aki.

Turismo ta nos unico pilar economico y ta e driver di nos economia.