Minister Dangui Oduber a anuncia cu lo drecha trapi na Rodgers Beach

Proyecto lo wordo financia cu fondonan di ATA y TPEF ---*Lo embeyece a area y lo renoba un di dos pier

ORANJESTAD (AAN) – Diaranson mainta Minister di Turismo sr. Dangui Oduber tabata presente na Rodgers Beach caminda e mandatario a anuncia cu lo bay drecha e trapi cu tin cerca di e beach.

            E area di Rodgers Beach pa hopi aña a wordo lubida y bandona, inversionnan cu mester a wordo haci no a tuma lugar pa e mantencion di e infrastructura di e area aki, asina e mandatario a señala. E trapi di Rodgers beach actualmente ta den un estado di decadencia y pesey Minister Oduber a tuma e decision pa renoba e trapi aki invirtiendo asina aki den producto Aruba.

            E trapi aki lo wordo financia cu fondonan di ATA y tambe di TPEF (Tourism Product Enhancement Fund).

            Na momento cu Minister Oduber a drenta Gobierno na 2017, Gobierno tabata tin un vision y un masterplan pa San Nicolas. Den esaki a inclui e proyecto di Baby Beach fase 1 y 2 (fase 1 ya caba a wordo entrega), a inclui e renobacion di e Oficina di turismo na San Nicolas. A introduci e festival cultural di Island Fest cu lamentablemente mester a para temporalmente door di e pandemia. Tambe kier a percura pa mehora henter e area di Rodgers Beach.

            Minister Oduber a elabora un tiki riba su vision y maneho pa e siguiente 4 añanan di gobernacion. E mandatario a menciona cu lo bay enfoca mucho mas riba e turismo niche. Esaki nan ta e turistanan di “low volume high impact”, e turistanan cu tin un entrada anual di mas di 150 mil dollar pa aña. Minister a splica cu na momento cu bo kier atrae e grupo di turismo niche aki, nan tin cierto spectativa, pesey ta importante pa sigui mehora e producto Aruba. Aruba ta conoci como un destinacion di calidad pa mantene e spectativa aki mester keda haci inversionnan, asina e mandatario a splica.

            Minister Dangui Oduber a menciona cu recientemente e inversionistanan di e hotel Secrets tabata na Aruba, unda nan expresa cu e proyecto hotelero lo sigui. Esaki despues cu e cadena di Hyatt a cumpra Apple Leisure Group cu tabata e inversionistanan original di e hotel Secrets. 

Plan pa Rodgers Beach

            Mescos cu a sosode na e proyecto di Baby Beach tambe ta planea pa pasa na Rodgers Beach. Lo bay inverti den e infrastructura caminda lo bay crea espacionan di parkeo, lo bay crea bañonan publico, lo bin cu kioskonan y restaurant pa ofrece cuminda y bebida na localnan y turistanan. Ya caba a renoba un pier y e intencion ta pa renoba un segundo pier tambe.

            Minister Dangui Oduber lo bay sigui cu e renobacion di pier asina cu sinta na mesa cu esnan cu a para e proyecto di pier cu ta e parke marino.

`           Oduber a sigui bisa cu Gobierno ta kere cu San Nicolas tin e potencial pa bira un segundo capital turistico di Aruba. Pesey Minister Oduber lo bay sigui inverti tambe den e oficina di Turismo di San Nicolas.

            Minister Dangui Oduber ta contento cu ta bay inicia e comienso di hopi bunita proyecto pa San Nicolas, pa turistanan y pa localnan. Finalmente e mandatario kier a gradici ATA pa kere den e proyecto aki y ehecuta e vision y maneho di Ministerio di Turismo, tambe DOW y Ministerio di Infrastructura pa e bon cooperacion brinda.