Minister Croes ta felicita e 24 graduadonan cu a sobresali como e miho graduadonan pa aña 2026

ORANJESTAD (AAN): Minister di Relacionnan den Reino, Educacion, Hubentud, Innovacion y Deporte, sra. mr. Gerlien Croes,

ta felicita e 24 miho studiantenan cu a ser honra durante e “Best Student Award Event 2026”, organisa pa Women’s Club of Aruba. E ceremonia aki a rindi homenahe na graduadonan di diferente scolnan di Aruba pa nan logronan sobresaliente durante e aña escolar 2025-2026.

E aña aki, e evento a conta cu e grato presencia di Gobernador di Aruba, Su Excelencia Alfonso Boekhoudt, acompaña pa su señora como miembro honorario di Women’s Club of Aruba. Hunto cu Minister Gerlien Croes, kende tabata presente pa personalmente saluda y celebra cu e graduadonan, nan a reconoce e dedicacion y perseverancia di e hobennan aki.

Un di e momentonan mas emocionante y significante di e atardi tabata ora un  graduado, Byron Lesire, a subi escenario pa comparti un bunita poema motivacional. Su palabranan di curashi y speransa a inspira tur presente, sirbiendo como un testimonio bibo di determinacion y superacion.

“E studiantenan cu a wordo honra durante e evento aki ta ehempel di disciplina y curashi. Nos como Gobierno di Aruba ta sumamente orguyoso di e logro di cada un di boso. E caminda pa yega na haci boso soñonan realidad no semper ta facil, pero boso a demostra cu e ta esun cu mas balor cu un persona por kies pa cana”, Minister Gerlien Croes a expresa.

E ‘Best Student Award’ ta un tradicion di Women’s Club of Aruba, cu tin como meta pa stimula excelencia academico y celebra ehempel positivo entre hubentud cu ta inspira otronan y comunidad en general.

Minister Gerlien Croes tambe a duna un palabra di aprecio na Women’s Club of Aruba pa nan compromiso continuo pa empodera e hubentud y promove educacion como pilar di desaroyo di Aruba. “E futuro generacion di nos isla ta un di e pilarnan mas importante cu nos por dedica na dje, empoderando nan cu tur locual nan mester ,” Minister Gerlien Croes a enfatisa. “Mi ta extende mi gratitud na Women’s Club of Aruba pa sigui pone esfuerso riba e potencial increibel di nos studiantenan y pa motivanan pa persigui nan soño”.

Nos ta felicita e graduadonan un biaha mas y ta invitanan pa considera esaki como un paso firme pa un futuro yena di confiansa y proposito. “E ruta padilanti por presenta reto, pero corda semper cu bo pais tin pleno confiansa den bo. Carga bo conocemento, bo balornan y bo vision cu bo, y keda enfoca riba positivismo,” Minister Gerlien Croes a conclui.

Representando Ministerio di Educacion y Hubentud, Minister Gerlien Croes ta extende su mas sincero felicitacion na tur e graduadonan sobresaliente di Aruba, deseando nan hopi exito den nan siguiente capitulo.