Minister Croes a reuni cu e representantenan di Stichting SOAZA

ORANJESTAD (AAN): Recientemente, Minister Endy Croes hunto cu Sra. Alexandra Tromp – Vrolijk a reuni cu Sra. Esther Kortram -Wilson,

Sra. Mirugia Leocadia - Zink y Sr. Calix Ashby di Stichting Onderwijs van Advent Zending Aruba (SOAZA).

            Durante e encuentro, a trata diferente topico di interes, manera e modelo di scol cu Soaza ta brinda na comunidad di Aruba. Soaza ta opera cu e sistema Americano pa e programanan di “Middle” y “High School” bou di 2 plataforma digital: Ideal School y ⁠Dawere International High School, cual ambos tin Cognia Accreditation.

            Tambe, e directiva di SOAZA a informa Mandatario di Enseñansa cu nan scol secundario tin un lista di espera. Pa acomoda e studiantenan aki, SOAZA a indica cu e scol tin mester di 2 lokaal extra y ta desea planifica di awo pa augustus con Gobierno di Aruba por yuda cu esaki. Sea ta cu un edificio bashi na San Nicolas of cu 2 modulair pa asina nan por agrega 2 klas adicional pa aloca e alumnonan.

            Ademas di esaki, a trata un proyecto di innovacion unda cu e scol ta ricibi financiamento. E proyecto aki ta yegando su final. A guia nan den e proceso con pa aplica pa ricibi financiamento via DUOS.

            Finalisando, Minister Endy Croes a expresa cu e tabata un bon reunion, unda a cera conoci un poco mas di cerca cu otro, kico e scol aki ta significa y con nan ta prepara nan alumnonan. A palabra cu lo keda den comunicacion cu otro pa e puntonan cu mester di atencion y percura pa hunto nos resolve esakinan prome aña escolar nobo.