Durante reunion mundial lidernan politico, comercial y organisacion civil
- Reunion mundial cumbre a afirma cu clima di miedo ta domina
- World Economic Forum a confirma cambio di normalidad mundial
ORANJESTAD (AAN) Ta wordo calcula cu alrededor di tres Mil lider politico, comercial y organisacion civil, a participa na e Foro Mundial Economico.
Nan a representa alrededor di 120 pais na e evento cu a conta cu 350 Hefe di Estado y otro gobernante.
E Foro Mundial Economico a wordo funda como foro pa maneho Europeo na 1971 dor di Klaus Schwab, profesor den asuntonan comercial di Universidad di Geneve.
El a cambia di nomber na 1987 pa asina bira un plataforma mas grandi pa lidernan mundial.
Generalmente no tin tanto atencion pa e reunionnan na Davos, Suisa, caminda na 2024 mundo a uni pa den turbulencia y mas turbulencia, yega na loke nan kier a alcansa segun nan tema di reunion, cu tabata “Rebuilding Trust”, crea confiansa nobo den un mundo cu ta spart for di otro.
Topiconan di e reunion sigur mester a inclui e cambionan cu ta wordo introduci dor di Inteligencia Artificial cu lo afecta sector comercial cu mester inverti den sumanan enorme mescos cu trahadornan cu lo conoce cambio den nan trabou.
Talbez e punto mas aserta a wordo presenta dor di Christine Lagarde, Presidente di Banco Central di Europa, caminda segun su palabranan comercio, consumo y inflacion a cuminsa normalisa na 2023.
Sinembargo, Lagarde a afirma e informacionnan cu DIARIO cu insistencia a presenta na su lectornan, cu ora papia di normal, no por tene e normal di ayera na bista.
El a mustra cu entrada di 2024 a bira entrada di un normal nobo den un mundo di cambionan grandi.
“Normal nobo” no a bini dilanti den su palabranan pero tambe den discusion di tur tema cu a bini na orden y cu a atende cu e orden mundial actual den cuadro di guera y problemanan serio cu ta afecta mundo.
A wordo papia di un epoca di miedo riba tur tereno cu por nota na mundo riba terenonan cu obviamente mundo no tin den su man y ainda no a soluciona manera sigur e cambio di clima y e cambionan pues di Inteligencia Artificial.
Loke a haci impacto enorme den e encuentronan cu DIARIO lo sigui presenta na publico, tabata e intervencion di e representante di World Health Organization cu a prepara mundo pa un situacion dramatico, causa pa un pandemia mas pisa cu Covid-19, cu no mester tabata un sorpresa pa mundo, manera awor ta bini dilanti.
Manera e representante di World Health Organization a trece dilanti for di Februari 2018, tabata tin un enfermedad cu nan a cualifica como Disease X, un enfermedad cu ainda tabata desconoci pero cu lo a conduci un pandemia den futuro.
Esaki a haci cu mundo a prepara su mes pa e posibilidad di enfermedadnan pisa. A registra Ebola, pero mundo a wordo confronta cu Covid-19, den cual e informacionnan cu tabata presente, a haci cu por a enfrenta e situacion mundial cu a surgi y a ataca tambe economia mundial.
E concepto di Disease X, cu no ta un enfermedad cu a wordo registra pero un posibilidad cu a haya nomber, ta haci posibel pa sigui prepara pa por confronta loke por produci su mes na mundo y afecta e economia mundial cu na e momentonan aki ta confronta hopi incertidumbre, manera ya a wordo bisa.
E miedo cu a keda atras pa un epidemia similar, cu segun a bini dilanti ta un riesgo den futuro, ta exigi pa tur pais prepara nan mes pa loke enfermedad di hende por haci su economia.
Mientras Disease X tin actualmente e atencion grandi despues di e encuentro mundial di lidernan, mester atende cu otro menasanan grandi cu sigur ta presente segun e congreso cu a pone enfasis riba resultadonan di cambio di clima cu ta afecta hende na momento cu e avance di Inteligencia Artificial tambe ta representa mas miedo pa cambionan cu sin bon maneho, por tin impacto enorme riba trahadornan pero tambe tur otro sector cu mester adapta na e sistemanan cu ta haci nan entrada.
Durante e encuentro di lidernan na e Foro Economico Mundial, a keda pues afirma e era actual ta caracterisa su mes pa miedo di hende enfrente cambionan y sucesonan mundial cu directamente ta mishi cu paisnan y cu hende.
DIARIO den su proximo edicionnan lo amplia en extenso riba informacionnan sumamente valioso cu ta papia di 2024 pues como e entrada pa un normal nobo di un mundo di cambio total.
DIARIO lo sigui informa su lectornan di tur informacion valioso cu a bini dilanti na entrada di 2024 cu cambionan importante.
