*Na 2024 lo sigui tambe cu Baki den Bario
ORANJESTAD (AAN): Dialuna atardi minister di Transporte, Integridad, Naturaleza y Asuntonan di nos Adultonan Mayor Ursell Arends a tene un conferencia di prensa, unda cu el a papia riba e campaña nacional di desperdicio, Limpi Limpi.
“Nos a lanza e campaña di concientizacion dia 22 di Augustus ultimo y nos a anuncia continuacion di e campaña desde cu nos a cera dump di Parkietenbos”.
Nos ta sigui tuma pasonan pa loke ta e actividadnan y e temanan cu ta refleha e desaroyo y e direccion unda nos kier bay, pa yega na un Aruba limpi limpi, segun Arends.
E minister a sigui bisa cu ora cu e anuncia continuacion di e campaña, a anuncia tres tema specifico.
“E prome tabata e conformidad cu e APV (Algemene Politie Verordening) y nos a encontra den diferente bario problema di con hendenan ta atende cu nan desperdicio”.
Den e bario di Moko nos a bin encontra dumpnan ilegal activo y nos a logra cera esakinan, despues di cual nos a haci e areanan limpi.
Despues di ricibi kehonan di varios ciudadano cu ta biba na Montserrat, nos a tuma pasonan tambe pa asina atende cu e problematica aki y aworaki e area aki ta completamente, segun Arends.
El a sigui bisa cu awor ta trahando riba un punto di maneho pa atende cu hendenan cu ta tira sushedad banda di caminda of na otro lugarnan cu ta susha naturaleza.
“Pa loke ta e conformidad cu e APV, mi mester gradici grandemente Bureau City Inspector, DOW y tambe DNM, pa yuda nos atende cu e tema aki y elabora tambe riba e ‘bepalingen’ cu mester tuma lugar”.
Cu nos esfuerzonan hunto nos por mantene Aruba limpi limpi y trece e concientizacion cerca nos ciudadanonan, segun e mandatario.
El a sigui bisa cu e di dos tema ta un Aruba Limpi mes y cu Aruba Tourism Authority (ATA) como un di e stakeholders principal a lanza su propio campaña, pa asina concientiza no solamente nos ciudadanonan, pero tambe nos bishitantenan , con pa anda cu desperdicio.
“E colaboracion a sigui wordo fortifica y nos por a tuma cu ATA mes a lanza un campaña pa sigui coopera cu Bureau City Inspector via e aplicacion FIXI”.
Nos a tuma nota tambe cu ATA a pone un total di 100 bari den areanan publico turistico, pa asina concientiza e bishitantenan di nos isla cu Aruba ta den e proceso di transforma, den e area di con pa atende cu desperdicio, segun e minister.
El a sigui bisa cu FIXI ta un aplicacion cu ta wordo maneha pa Bureau City Inspector .
E bureau ta ricibi tur e kehonan y ta evalua si nan mes por atende cune, of nan ta pase pa e departamentonan di Gobierno concerni, pa asina nan tuma accion.
Minister Arends a keda hopi satisfecho cu e actividad di ‘Baki den Bario’ y a anuncia cu lo continua cu esaki na 2024 tambe.
