Lider di Fraccion di MEP:
ORANJESTAD (AAN): Lider di Fraccion di MEP, Parlamentario Hendrik Tevreden a referi den un entrevista na e tema di criminalidad bao di e hobennan. El a indica cu si un hoben mes cay den man di husticia, esey kiermen cu ta uno di mas.
Por traha riba e parti di husticia represivamente, pero tambe preventivamente y den e direccion ey kier cuminsa fortifica e parti di prevencion. Esey ta nifica cu tin cu bay bek na e famia. Ora cu e hoben ta den famia kico por pasa. Si acaso e bira un 'drop-out', con ta bay soluciona esey?, Tevreden a indica.
Parlamentario Tevreden a sigui bisa cu e tipo di situacionnan aki ta duna espacio pa e hoben bay pensa riba cosnan negativo, con pa haya un arma, con pa tira un atraco. "Cosnan cu ta stroba e desaroyo den nos pais. E seguridad di nos pais".
E parlamentario a referi inmediatamente na cifranan caminda el a laga sa cu e pistolnan cu a wordo confisca desde 2019 pa 2023 ta 15 pistol na 2019, 14 na 2020, 12 na 2021, 20 na 2022 y 13 na 2023.
Aunke algun aña pa otro e cifra por a baha, ta keda un cantidad di pistol cu ta di mas. Kier mira pa esaki baha te na cero of hopi menos cu e cifranan aki, a remarca. "Un pistol ariba caya ta un menasa pa nos ciudadanonan", a bisa.
A señala cu e plan di Minister di Husticia Rocco Tjon di kier hiba un maneho mas stricto ariba esaki ta basta 'duidelijk'. Di 2022 pa 2023 a mira un disminucion loke ta mustra cu ta bayendo den bon direccion, pero ta keda para riba cu kier pa e cifranan bira mucho menos den 2024.
Tin carnaval 70 na caminda y ta conoci con e cosnan ta bay den e temporada aki. A haci peticion den Parlamento, durante tratamento di presupuesto, pa tin un plan stricto 'in place' pa asina por evita cu e personanan cu ta bay carnaval cu intencionnan robes pero tambe esnan rond cu ta bay un actividad pa no mira e tipo di casonan di violencia ta tuma luga, a indica.
Den parlamento a hiba un bon debate riba e tema aki riba un nivel hopi bon cu apelacion na gobierno y ta spera cu por mira esakinan concretisa den resultadonan positivo, a bisa.
