ORANJESTAD (AAN): Keurmento di auto ta importante! DTI kier duna información na e pueblo di Aruba encuanto e procedura pa keur vehiculonan di motor.
DTI ta haci su keuring abase di e requisitonan cu tin den “Landsbesluit Voorschriften Voertuigen” (AB 1999 no. 61,) Pa loke ta e parti di seguridad ta importante y esencial pa e vehiculo ta cumpli cu e requisitonan.
E ta hopi importante pa keur bo vehiculo di motor, pa motibo cu esaki ta un chekeo pa cu e condición di e vehiculo y ta hisa e seguridad di e usuario cu por ta bo mes, di bo famia, bo trahador of un turista cu ta di bishita na Aruba.
DTI ta sugeri pa keur e vehiculonan pa evita desgracianan innecesario, evita boetnan of gastonan halto .
Pa locual ta trata e dianan di fiesta DTI lo ta habri full december cu excepcion di e dianan oficial di fiesta cual ta 25-26 december 2023 y 1-2 januari 2024
DTI lo ta habri 27-28-29 december 2023 y 3 januari 2024 nos lo habri back pa publico.
Pa traha cita: Orario pa traha cita ta di 7:45 am pa 11:30 am, y di 1:00 pm pa 3:30 pm.
Keuring di vehiculo di motor ta di dialuna pa diabierna di 7:30 am pa 12:00 pm y di 1:00 pm pa 4:00 pm. Pa traha un cita mester presenta personalmente na DTI su kantoor sitúa na Barcadera 153, conhunto cu e documentonan necesario y ta haci e pago di biaha.
Mester trece e siguiente documentonan y informacion pa traha cita: (*) Registratie formulier DIMP (esaki no ta e comprobante di pago), (*) Aseguro valido, (*) Si ta trata di un vehiculo cu ta ser uza pa transporte publico mester presenta cu e vergunning valido of un carta di DTP cu esaki ta den proceso.
Keuring di e vehiculo: Riba dia di cita di keuring tin cu presenta na balie paden di keuringshal cu e siguiente documentonan: (*) Comprobante di e cita, (*) Keuringsbewijs bieu (si e vehiculo a yega di keur caba), (*) Registratie formulier di DIMP y (*) Comprobante di Aseguro valido.
Si e vehiculo worde goedgekeurd e ta ricibi un sticker di cual ta worde geplak ariba e windshield y ta ricibi e keuringsbewijs. Si acaso ariba e dia di keuring e vehiculo worde afgekeurd y e ta algo reparabel e oportunidad ta worde duna pa dentro di 30 dia regla esaki y bin back DTI (esaki nan ta yama un herkeuring).
Ora bo mester keur bo auto: Si bo a cumpra un vehiculo nobo di fabrica pa uzo personal bo tin cu añadi 3 aña ariba e bouwjaar y es aña ey bo persona lo tin cu keur bo vehiculo pa prome biaha. Por ehempel es aña aki e vehiculonan pa uzo personal cu bouwjaar 2021 lo mester bin keur pa prome biaha.
Despues di e prome biaha e vehiculo di motor pa uzo personal mester worde gekeurd cada 2 aña.
Pa transporte publico (personenvervoer) ta conta otro duracion: (*) Vehiculonan cu uzo como autobus, bus, taxi, tour-operators (T-O) etc, tin cu keur cada aña y e vehiculonan nobonan prome cu nan subi caminda nan lo mester keur esakinan. (*) Den caso cu si nan a haci cambionan na e vehiculo of tabata den un accidente lo tin cu bin pa keur esakinan un bez mas prome cu haci uzo di nan ariba carretera. (*) Pa vehiculonan di compañia (bedrijfsauto’s), trucks, pickup tin cu keur cada 1 aña.
Keuring ta tuma lugar conforme requisitonan di Landsbesluit voorschriften voertuigen (AB 1999 nr. 61). Por haci un peticion na DTI pa ricibi e requisitonan conforme e ley via email This email address is being protected from spambots. You need JavaScript enabled to view it..
