Minister Arends a anuncia campaña di 'Responsible Pet Ownership' di NPSA

A anuncia ganadornan di concurso di diseño

ORANJESTAD (AAN): Na comienso di april 2022, Minister Ursell Arends, kende ta encarga cu Dierenwelzijn, a anuncia e National Plan for Stray Animals (NPSA) cual lo brinda solucionnan integral pa e problematica di mascota riba caya.

            Proximamente lo cuminsa un campaña di informacion, mirando e necesidad di educacion pa compronde no solamente e problematica, pero tambe stimula “responsible pet ownership”, y promove comprencion pa e necesidad di controla e problematica. Aruba tin un gran cantidad di mascota riba caya cual ta possee un riesgo pa salud y siguridad, pero tambe ta un forma di bida inhumano pa mascotanan, hopi di cual tabata pertenece na un famia.

            Pa e campaña informativo di NPSA, a haci un yamada na scolnan secundario, pa yuda bin cu idea pa un icono of caricatura cu por ser uza como e personalidad central na e campaña. Minister Arends ta hopi contento di e grado di participacion, y tambe grado di creatividad cu algun hoben a desplega. Un palabra di gradicimento ta bai na Minister Endy Croes y su ministerio di Enseñansa y Deporte pa e colaboracion y sosten pa e proyecto aki.

            Masha pabien na e ganador y tur e finalistanan, y tambe na e hoben cu a gana e premio di “diseño mas creativo”. Masha danki na tur cu a participia y contribui na e concurso! 

Ganadornan:

Angelina T. – Abraham de Veer School

Juliette M. – Abraham de Veer School

Owen C. P. – Juliana School MAVO

Gabriel S. – Juliana School MAVO

Ciara C. – Ceque College MAVO

Pintura mas creativo: Yair C. – EPB

            Un yamada ta sigui bai na comunidad, pa adopta mascota y evita cumpra mascota di rasa. Tena na cuenta cu pa tin un mascota bo tin e responsabilidad di  e cuido y cariño necesario. E responsabilidad tambe ta sigui pa tur e criaturanan cu e la (yuda) trece na mundo si no laga sterilis’e.