Creacion di trabou y bienestar social ta e diferencia grandi den dos gobernacion - *E “werkverschaffing” di Mike y creacion imprudente di proyecto a bira caida Aruba - *Mike a pone Pueblo baila pa Maduro y Evelyn hunto cu Parlamento ta negocia proyecto
ORANJESTAD(AAN)—Pa Aruba bolbe urna electoral na 2021, periodismo mester duna Pueblo e hermentnan pa por huzga gobernantenan riba cada aspecto di gobernacion.
Den e prome rubrica di “Debate 2021” nos a pone e maneho financiero di gobierno Mike Eman enfrente e maneho di Evelyn Wever-Croes. E segundo articulo a bay den detayes riba e maneho economico tan diferente di e dos gobiernonan.
E siguente punto mester bira e maneho duradero di e calidad di bida cu gobernacion a base di situacion financiero y economico, ta entrega na e poblacion actual di Aruba y na generacionnan cu ta sigui.
Ora papia di maneho social di Mike Eman, nos ta mira un Prome Ministro cu semper tabata centro di actividadnan y mester a briya den tur suceso cu lo mester tabata resultado di su trabou, pa cual Pueblo a entrega un bon salario mensual na su persona.
Na un forma of otro, cada bez cu analisa loke Mike Eman a haci pa e pueblo di Aruba realmente, ta topa cu Mike mes como figura central cu pueblo mester carga y considera como un dios mientras Aruba tabata zink.
Den e documentonan cu ta forma parti di e gobernacion administrativo di Mike Eman, hopi bez e palabra “fantasia” ta bini dilanti. E Presupuesto 2017 cu Mike Eman a laga atras pa gobierno Wever-Croes, cu a wordo cualifica como fantasia dor di Reino Hulandes.
Fantasia tabata loke Mike Eman a entrega na Pueblo di Aruba ora el a introduci atrobe e sistema di werkverschaffing pa cual no su propio placa a paga, pero placa di Pueblo cu no por a paga ni ayera, ni awe pa loke Mike a produci pa e por a haya voto y keda Prome Ministro.
E conclusion aki por sona duro, pero ta e puro berdad hancra den rapportnan cu ta mustra con Mike a actua contra leynan cu ta dicidi con ta goberna Aruba y con ta gasta placa di e Pueblo y con Mike a trapa riba Parlamento como instituto cu ta representa Pueblo y ta garantisa cu Pueblo ta participa directamente na gobernacion.
E forma cu Mike a atende Citgo, cu mester a pone mundo bati man pa su persona, awe porfin ta bini dilanti den rapportnan mescos cu e “werkverschaffing” di Mike cu a haya nomber di “Bo Aruba” den cual Mike a uza e Arubiano pa e haya voto dor di parti contractnan cu pa un rato a duna cierto gruponan entrada, pero a kita placa finalmente for di boca di henter Aruba.
Esaki ta e cambio grandi entre e maneho social di Gobierno Mike Eman y Gobierno Evelyn Wever-Croes.
Como Prome Ministro, Evelyn Wever-Croes ta trahando riba dos proyecto sumamente importante pa Aruba, cu ta Eagle LNG cu mester cambia e peso di prijs di awa pa Aruba y crea trabou y e refineria di Quanten.
For di momento cu Wever-Croes a introduci e proyectonan aki, el a mustra cu no por baila ainda pero mester tuma tempo pa negocia bon cu e companianan.
Refineria di Aruba ta bini dilanti semper como e organo di negociacion cu Eagle LNG y Quanten cu Evelyn Wever-Croes a presenta na Parlamento di Aruba for di prome momento cu nan a subi scenario di Aruba.
Mike Eman a bay cera e deal mas peligroso cu historia di Aruba a conoce, cu ta Citgo, cu e homber mas peligroso di America Latino actualmente y e proyecto Citgo mester a spart den cara di tur e trahadornan y habitantenan di Aruba cu Mike a priminto un bida di sheik.
E maneho social actual di Aruba mester resulta di un plan di maneho concreto pa economia di Aruba, di Wever-Croes hunto cu 125 Arubiano capaz.
Den un pandemia e maneho social di Gobierno Wever-Croes a duna aliento na un pueblo, cu a sinti su mes participante den e causa pa Aruba.
Cu reactivacion economico y medidanan financiero Evelyn Wever-Croes a dirigi un Aruba cu e no a entrega “werkverschaffing” cu placa di Pueblo, pero a inspira pa lora nan manga di camisa y hunto traha pa como un famia, Arubianonan por reuni na mesa y come awe y den futuro.
