ORANJESTAD (AAN): Diaranson mainta cu dos Tugboat di Aruba Ports Authority dunando un ‘water salute’ cu nan cañon di awa, na un forma ceremonial
a duna bon bini na e prome crusero cu pasahero abordo, despues di 15 luna cu e industria aki den Caribe tabata paraliza.
Manera DIARIO a menciona caba anteriormente, e barco crusero Celebrity Millennium cu normalmente tin capacidad di 2.200 pasahero, e biaha aki tabatin solamente 25% di turista abordo, pues un total di 548 turista. Esaki ta den cuadro di e guidelines cu autoridadnan a stipula pa e industria crusero nabega cu capacidad reduci. Tur barco cu lo yega Aruba den futuro cercano tambe lo tin capacidad reduci di pasahero abordo.
E barco luhoso di Celebrity Millennium a sali Diasabra 5 di Juni for di e waf di Philipsburg na St. Maarten. Nan a bira asina e prome den Caribe y Norte America cu ta haci esey, y e prome di e barconan di Celebrity cu ta cuminza opera bek.
Nan a sali riba un viahe di 7 anochi, bishitando e isla di Aruba, Barbados, y Curacao. Pasaheronan cu a warda 15 luna pa por a nabega atrobe, tabata cla pa experiencia e maraviya riba lama.
“Awe nos ta nabegando atrobe! Esaki ta un momento hopi significante pa nos compania, nos industria, y Caribe. Cu e dia aki porfin a yega pa nos huesped y nos tripulantenan ta algo special,” ta loke e CEO di Celebrity Cruises, esta Lisa Lutoff-Perlo a bisa.
MEDIDANAN NOBO:
Celebrity Millennium tambe a bin cu medida, forma na forma diligente cu autoridadnan di salubridad publico, agencianan gubernamental, y un panel di Healthy Sail, consistiendo di lidernan cientifico, medico, y di salubridad publico. Tur barco lo cuminza nabega den fase cu capacidad reduci pa asina permiti mas espacio natural. Tambe a crea procedimento nobo pa salida, yegada, y training di emergencia pa pasaheronan (muster safety drill), y tambe cambio den forma cu ta bende ticket pa excursion ora nan yega e.o. Aruba, y tur esey ta refleha un standard nobo pa salud y seguridad.
- Vacunacion: Celebrity lo nabega den Caribe cu tur tripulante ya vacuna y por lo menos 95% di pasaheronan mester ta vacuna.
- Salida y yegada: Lo bay duna tur pasahero un horario cu e mester tey pa sea subi of baha e barco, pa asina reduci cu tin aglomeracion ora di haci esey.
- Transaccion contactless: E mobile app digitalmente avanza di Celebrity ta transforma e estilo bieu di bisti salbabida y bay train emergencia pafo, den un experiencia personal di eMuster cu bo por completa riba bo app mes.
- Tapaboca: Ora di check-in na e Terminal y tambe check-out, tur pasahero di 2 aña of mas tin di bisti un tapaboca. Pero ora bo ta abordo, bo no mester di tapaboca. Solamente si nan ta mara na un waf unda Gobierno ta obliga esey. Esaki segun guia recien di CDC di Merca pa nabega cu hendenan ya caba vacuna y tripulantenan tambe vacuna.
Riba e potret por mira momento ceremonial Diaranson mainta ora Celebrity Millennium ta yegando Waf di Oranjestad.
