ORANJESTAD (AAN)—Minister Presidente Evelyn Wever-Croes, den conferencia di prensa a expresa, den e tema di salud, cu despues di e puntonan mas critico di e pandemia, Aruba ta, actualmente, na 28 caso activo pa loke ta trata covid-19.
E mandatario a señala cu e ultimo siman e cantidad average ta cuater caso nobo pa dia, cual ta un bon promedio, cu por wordo bon maneha.
Tambe e positivity rate (cuanto caso positivo tin tur dia) tambe ta na un average di 8%. Esey kiermen, cu di tur esnan cu haci test, 8% so ta wordo detecta di ta positivo. Riba grafico e mandatario a mustra e desaroyonan cu tin desde Maart di e aña en curso, con a yega na e pick di 704 caso y awor nos ta den un area hopi, hopi comfortable, y por bisa cu Aruba tin e pandemia domina.
“Esaki ta danki tambe na e grado di vacunacion cu a mas of menos igual na locual nos a anuncia siman pasa, entre 67 cu 68% y den nos 60 plussers 72%. Mi kier recorda tur hende cu den e facilidad na Sporthall na Santa Cruz, na Centro Libertador Betico Croes, ta habri ainda te cu 1 di Juli, y nos ta recomenda specialmente esnan cu no a vacuna ainda, pero hacie na un forma mas senciyo y mas lihe, sin tin nodi haci cita, pa acudi libremente akinan. Despues di 1 di Juli, e maneho ta cambia y e ora ey e facilidad aki no ta bay ta habri mas, y ta bay tin otro forma pa nos yega na esnan cu no a vacuna ainda. Pues, por fabor tin un siman ainda pa yega y vacuna”, Prome Minister a subraya.
E dignatario a dirigi muy specialmente na esnan cu tin pensa di bay afo cu vacacion, den e temporada di vacacion grandi cu ta den porta. Despues di 1 di Juli e vacunacion ta bay segun cita, y no ta den un dos tres, e persona ta haya esaki, pasobra nan mester wordo bon planifica.
Minister Presidente a menciona cu gobierno ta considerando e ultimo reglanan di flexibilidad, ainda. Nan ta riba agenda di Crisis Team pa sigui traha riba nan, pa yega na e punto unda lo no tin e limitacionnan di movecion mas, na Aruba.
