Voznan ta lanta den comunidad pa castigo pa promesa electoral falso
*E mester honra aumento cu 700 Florin pa luna prome cu e huramenta
*Awor SVB ta haci estudio di loke Mike mester a studia prome cu promesa
ORANJESTAD (AAN) — “Si Mike Eman no por honra e promesa cu el a haci na grandinan cu e ta subi pensioen di behez cu 700 Florin pa luna, e no por bira Prome Ministro di Aruba.”
Esaki ta conclusion di expertonan riba tereno gubernamental cu kende DIARIO a hiba conversacion a base di reaccionnan serio ariba e situacion di grandinan.
Cu e sacrificionan cu Aruba a haci a laga espacio pa por a aumenta e pensioen di behez na Aruba, ta algo cu a bira visibel den cartera di grandinan cu a haya aumento di nan entrada a base di estudionan y vigilancia responsabel di e fondo di pensioen di behez.
Sinembargo, manera semper corectamente DIARIO a splica Aruba, mester vigila problemanan cu por presenta cu mal maneho di pensioen di behez a base di e realidad cu e cantidad di grandinan ta aumenta rond mundo mientras cu e cantidad di personanan activo riba tereno laboral ta bira menos a base di e proceso cu ta tene hende mas largo na bida mientras cu planificacion moderno di familia a afecta e participacion di comunidad na e fondonan di pensioen.
Manera DIARIO a mustra for di prome cu eleccion, tabata sumamente peligroso y hasta irresponsabel pa AVP a priminti un aumento di 700 Florin di pensioen di behez cu a bira e motibo grandi cu AVP a haya voto di grandinan.
Pa tur experto cu ta sostene articulonan di DIARIO ta inaceptabel cu awor SVB ta bay eherce e estudionan necesario pa mira si por honra e promesa cu a wordo haci dor di AVP pa a gana eleccion y asina crea speransa firme cerca e grupo di grandinan, cu nan situacion lo wordo alivia cu un suma importante.
Manera expertonan ta mustra e suma cu AVP a priminti, ta un suma basta halto cu no ta sin mas ta duna hasta un persona cu ta den empleo na trabou.
A wordo mustra cu pensioen di behez ta basa riba e sistema di un aseguro cu ta depende di entradanan di poblacion, cu a cambia di tal forma cu e ta afecta e sumanan cu SVB mester paga sin aumento di pensioen di behez.
E forma cu edad di hende ta subi ta aumenta e cantidad di personanan cu ta haya pensioen di behez rond mundo mientras cu planificacion di familia pues a cuminsa afecta e poblacion mundial cu awor ta sinti e peso di planificacion di familia cu durante añanan setenta ya a bati alarma na tur organisacion y compania cu ta traha den sector di aseguro riba tur tereno cu tin relacion cu bida di hende.
Paisnan grandi y poderoso, manera DIARIO a splica ampliamente, ta continuamente ocupa cu e tema di pensioen di behez.
Mas y mas ta anima poblacionnan pa asegura nan mes tambe na companianan priva pa asina nan mes yuda garantisa un entrada den un mundo cu a cambia tambe di mentalidad pa loke ta trata e relacionnan familiar.
Mas y mas hende ta inclina pa biba riba nan mes loke ta aumenta e gastonan den seno familiar.
Expertonan ta duna continuamente mas evidencia na DIARIO, con e cambionan cu ta presenta na mundo, ta afecta e calidad di bida di hende cu por cambia na momento cu hende bandona e proceso laboral pa motibo di edad.
Informantenan di DIARIO for di prome momento a considera sumamente peligroso cu AVP, conoci pa su promesanan politico pa haya voto sin tene cuenta cu e resultadonan pa comunidad, atrobe ta entrega prueba di falta di responsabilidad politico pa maneha bienestar di Pueblo.
Informantenan ta mustra cu for di momento cu AVP a papia di aumento di pensioen di behez pa el a haya voto, e mester a studia e materia di tal forma cu awe AVP ta entrega na SVB e formula gubernamental pa aplica pa adsina sin problema SVB por aumenta e pensioen di behez na Aruba.
Manera a wordo indica no por ta posibel cu awor cu Gobierno Mike Eman kier mester bira realidad, SVB mester haci e trabou cu Mike Eman mester a dirigi den seno di su partido pa asina introduci e aumento priminti na grandinan di Aruba.
Prueba ta demostra cu cada eleccion na Aruba cu AVP a gana tabata basa riba promesanan cu e no por a honra manera e hecho cu lo a baha BBO, cu a causa desastre financiero pa Aruba y na final no por a deshaci di BBO manera for di principio tabata conoci.
Segun informantenan si AVP no por subi pensioen di behez cu 700 Florin pa luna, Mike Eman no por bira Prome Ministro di Aruba pasobra ta un promesa serio el a haci na grandinan sin por entrega e prueba cu e no ta rementa henter e sistema di pensioen di behez.
DIARIO lo sigui informa Aruba di un situacion sumamente serio directamente despues di eleccion y prome cu Gobierno Mike Eman 3 a bira realidad.
