Mike Eman tabata e prome Coordinador di un Gobierno di Aruba
*Hulanda cu 17.8 Miyon habitante tin total di 27 gobernanente
*Hefenan di Departamento mester sostene gobernante na Aruba
ORANJESTAD (AAN) — Ta cu asombro enorme Aruba a tuma nota di e informacionnan cu ta bini dilanti den formacion di Gobierno Eman cu mester habri porta pa Secretarionan di Estado (Secretario di Estado) cu mester asisti Ministronan den nan trabou.
Manera informacionnan ta indica, durante formacion di Gobierno di Aruba ta wordo papia di un supuesto introduccion di Secretarionan di Estado pa Aruba tambe pa asina facilita trabou na Ministerionan.
E informacionnan cu lo a nace den seno di AVP a causa basta reaccion cerca DIARIO pasobra e sistema di gobernacion di Aruba ta basa riba e hecho cu e principal conseheronan y asistentenan di Gobierno di e pais, ta e Hefenan di Departamentonan, cu segun e areglonan di gobernacion na Aruba, mester sostene e trabou diario di gobernantenan y Parlamento.
Hasta ta asina cu den ley di Aruba, Departamentonan di Gobierno mester sostene Parlamento di Aruba cu cualkier informacion of ayudo necesario pa nan por haci nan trabou.
E sistema di coordinador di Gobierno a wordo introduci cu entrada di e prome Gobierno di AVP y tabata e persona di Mike Eman cu a bira sombra pero tambe e persona di contacto di e prome Gobierno di Aruba, cu a bini cu e fenomeno di coordinador.
Tur tempo Ministerionan a funciona ekipa profesionalnan pa yuda tanto gobernantenan como Miembronan di Parlamento den ehecucion di nan trabou.
Ora papia di e aparato gubernamental, ta papia hustamente di personal cu ta wordo paga pa sostene e trabou di personanan cu a wordo eligi pa representa Pueblo of dirigi e pais.
Ta cu e prome gobierno di AVP, Mike Eman a bira e prome coordinador di Aruba y awe kier perpetua e tarea aki cu ta presenta gasto enorme.
E cantidad di habitantenan di Aruba no por wordo compora cu e poblacion Hulandes di 17 pa 18 Miyon persona cu un sistema gubernamental compleho mientras nan ta na mes momento gobernantenan di Reino.
Kende lo paga e total di 16 gobernante na Aruba cu sin duda lo haci posibel pa mas hende di AVP bira parti di Gobierno, ta keda e pregunta grandi sigur na e momento cu sacrificio enorme di Pueblo di Aruba a percura pa recuperacion di Aruba.
Kico lo ta reaccion di Hulanda si Aruba redobla su cantidad di gobernante, sigur ta un pregunta grandi na momento cu ya ta bira evidente pa Pueblo di Aruba, kico e por spera di Gobierno Mike Eman, dirigi pa e persona, pues Mike Eman, cu for di 1986 pa e parti mas grandi di su bida, tabata riba payroll di Pueblo di Aruba y awor kier habri porta pa mas gobernante bin gana placa di Pueblo di Aruba, si e informacionnan cu a alcansa DIARIO como posibel plannan di formador Mike Eman, ta cuadra cu loke cu e realidad di e ambiente di AVP actualmente.
