ORANJESTAD (AAN): Un di e voznan na radio cu por a scucha hopi desde decada di 1980 caba na emisoranan local, tabata esun di Vic Wernet.
El a bira hopi popular danki na su comienzo na e emisora di Radio Carina FM 97.9 MHz, unda e tabatin programacion special, tin biaha enfocando riba shownan cu e ta prepara pa su audiencia di fin di siman. E tempo ey el a bira popular cu e show di “Un ora cu Vic’.
El a haci e show aki uno mas di cas, esta cu entrevistanan cu tur hende di musica, teatro, y cultura di Aruba mes. Nan tabata entrevistanan di caliber halto, cu bon grabacion y cu tabata tene e atencion di e audiencia di comienzo te fin.
Danki na esey, den pueblo tabata conoce simplemente como ‘Vic’. Su voz trankilo sin stress, tabata facilmente reconoci via e ondanan radial, y su wowo pa bin cu calibernan halto di show, a pone bira un locutor hopi respeta den mundo di radiodifusion local.
Awendia ya Radio Carina FM no ta existi mas, pero el a sigui haci show na e.o. Magic FM 96.5 MHz cu ta pertenece na Erin Croes. Su programacion a sigui cu e mesun entusiasmo, contenido, y sigur ta acapara atencion. Vic realmente tabata stima cultura di Aruba, y a haci su best pa laga esaki sigui wordo empuha pa yega na un nivel halto, specialmente pa hobennan y futuro generacion. Su show na e emisora di Magic FM tabata yama ‘Un Pueblo”.
Riba Diasabra, e informe a drenta cu Victor Wernet a fayece cu 67 aña di edad. DIARIO ta expresa su mas profundo palabra di condolencia na su famia, amigonan, coleganan, y profesionalnan den mundo di radiodifusion na Aruba.
