Evelyn na Mike: "E lider politico di AVP mester grow-up" - ORANJESTAD (AAN): Semper e votonan individual ta keda motivo di speculacion.
Pa e eleccion aki e no tin influencia otro cu ken ta bay den Parlamento. "Si bo a saca bo mes of bo tin un number. Nos a saca 9 asiento. Esey kiermen cu 1 te cu 9 ta bay den Parlamento. Anto si un otro number cu no ta 1 te cu 9 saca su mes, e ta drenta Parlamento, asina Lider di Partido MEP, Evelyn Wever-Croes a splica.
Esey ta e unico informacion cu e votonan individual lo duna. Den futuro, a agrega, e ta influencia ora cu un otro persona tin mas voto, esey kiermen cu esey lo wordo treci den congreso y esey lo por wordo dicidi eynan, a indica.
Segun Wever-Croes, e no tin ningun problema cu esey. E ta hopi democratico. E ta kere cu tur cos ta pasa pa un motibo.
A pone como ehempel cu si un colega di dje, saca dobel di su votonan, no ta asina cu e persona ey automaticamente tin cu bira minister presidente pasobra e tabata lider di e partido na momento cu a bay eleccion.
Pero ta haci si cu aki dos aña, ora cu tin congreso, e mester realisa cu tin mas sosten na otro colega y e no mester di e posicion di lider mas y di un manera husto e ta cede e posicion pa e colega cu su partido tin mas confiansa of cu tin mas deseo di mira. "Ami kier mira pa Aruba bay pa dilanti y pa MEP crece", e politico a expresa.
Pa loke ta e peticion cu tin den partido AVP pa haci un re-conteo di votonan, e lider di partido MEP a declara cu e ta haya cu e lider politico di AVP mester 'grow-up'.
"Ora cu nos kier a haci e cos aki digital pa por evita e discusionnan aki, mundo a hera caba. Atrobe nos ta haci un cos fout. Nos a hacie manual manera cu e tabata kier. Tampoco ta bon y awor e ta exigi reconteo", a enfatisa.
Finalmente, Wever-Croes a laga sa cu no ta e esun cu ta dicidi riba un re-conteo. Conseho Electoral ta independiente den esaki y nan lo tuma e decision y e como lider politico lo scucha kico ta e decision di nan.
"Ami ta haya cu nos mester madura den e pais aki si. Ora nos kier a bin cu un solucion hustamente pa esey, mundo a hera caba. Aworaki nos tin cu biba cu loke nos tin y ohala cu nos por haya si un parlamento hopi lihe den futuro cu por cambia e ley pa nos bay na sistema digital. Keda traha y conta te 3'or di madruga no ta normal, no ta humano. Esey ta loke nos kier a evita", Wever-Croes a declara.
