ORANJESTAD (AAN) – Manera ta conoci e siman aki a habri cu e prome rondanan di reunion entre Gobernador Alfonso Boekhoudt cu diferente departamento y e lidernan di e partidonan cu pueblo a sostene cu nan voto, pa haya asiento den Staten.
E reunionnan aki, manera ta conoci, ta den contexto di nombramento di un Informador y formacion di gobierno na final di e proceso.
Den un entrevista cu señor Frits Goedgedrag, Presidente di Raad van Advies, cu ken Gobernador a papia na prome instancia, a menciona cu RvA ta un di e conseheronan importante di gobierno, mescos cu Algemene Rekenkamer.
“Nos rol ta cu nos ta duna Gobernador, riba su peticion, nos opinion kico mester sosode, riba kico, si bin un informador of formador, nan lo mester concentra nan mes. Esey ta loke nos a haci awor ey. Asina cu eleccion a tuma lugar, Diabierna ultimo, nos a bin hunto como Raad van Advies y nos a duna nos opinion”, señor Goedgedrag a señala.
Riba un pregunta di prensa, presidente di Raad van Advies, a indica cu no tur ora gobierno of parlamento ta sigui e consehonan di e instancia aki. “Nos ta un consehero, nos no ta contrincante di gobierno ni di Parlamento; nos ta duna nos opinion segun nos conocemento y consenshi y esey nos ta haci. Ta un pregunta hopi interesante, y segun mi tur conseho consultativo ta pasa aden. Na Hulanda tambe, tin biaha Raad van Staten ta kibra su cabes den kico gobierno ta sigui nos y den kico no, y esey ta decision democratico di un Gobierno. Tin hasta estudionan unda hende a promove riba esey. Pues, no ta algo cu mi por contesta den un, dos, tres” e funcionario a expresa.
El a agrega cu RvA tambe ta spera hopi biaha cu gobierno sigui locual nan ta conseha, pero ta den un pais democratico nos ta biba, y esey ta locual cu ta sosodiendo.
