Virus ta plama den regionnan importante den criisis Ukraine --- *Variante nobo di Omicron ta plama y por ta mas peligroso --- *Scondi tras di Delta y Omicron tur hende mester cuida nan mes
ORANJESTAD(AAN)—Pa cuanto tempo un Gobierno por kita derecho di un persona pa haci cu su bida loke e kier? Esaki sigur ta un punto cu mester tuma na consideracion den e decision di diferente gobierno na mundo, incluso Aruba, pa deshaci di medidanan oficial contra Covid-19.
Mientras mas y mas pais ta despedi di e medidanan di Covid-19, un situacion serio ta surgi na mundo cu ta registra un aumento enorme di e cantidad di casonan di Omicron na e partinan di mundo, caminda tambe tin e crisis di Ukraine actualmente.
Na Rusia, na Ukraine y cantidad di pais den vecindario, Omicron ta plama cu rapidez.
Na Hong Kong e ta forma un desastre medico pa hende, cu ya no por conta cu suficiente espacio den hospitalnan cu mester laga hende riba caya.
Kico esaki ta nifica y kico mester spera di Covid-19?
Un mundo cansa di e pandemia ta trata di deshaci di medidanan cu a cambia bida na tur pais.
Pero mester splica cu e peliger di Covid-19 no a termina tur caminda.
Ora atende cu cifranan di e Organisacion Mundial di Salud, por nota cu ta papia di situacionnan preocupante sigur na Asia pero tambe, manera ya bisa, e paisnan Oriental na Europa.
DIARIO ya a yega di expresa su preocupacion pa e hecho cu e guera na Ukraine ta nifica cu tropanan ta move y cu e enfermedad ta haya mas oportunidad pa plama.
Esaki ta exactamente loke ta pasa.
E paisnan den laman pacifico cu awor ta wordo confronta cu e variante Omicron, ta haya nan mes den un situacion mas dificil pasobra cantidad di pais kier habri nan porta.
Con mester subi un caminda nobo? DIARIO ta sigui tur informacion cu mester entrega como periodista na Aruba, caminda responsabilidad personal ta importante awor.
Mester tene na consideracion cu Omicron por wordo importa ainda pero tambe e variante Omicron cu ta “sconde” su mes y hasta ta wordo yama e “variante scondi”.
E variante nobo di Omicron ta disfrasa su mes den curpa di hende y ta dificil pa descubri su presencia.
Tambe ta dificil pa determina si e ta Omicron of Delta cu tambe ainda ta presente na cantidad di pais.
E organisacion mundial di salud ta pidi tur hende pa sigui mantene e reglanan di higiena. Pa bisti mask ora ta den luganan cera cu mas hende y pa evita lugarnan cera sin ventilacion.
Gobierno no por mantene medidanan di emergencia pa semper. Na e momentonan aki tur hende mester asumi nan responsabilidad enfrente nan mes y otro hende y cuida nan curpa den un situacion mundial cu ta suamente serio y por empeora no solamente pa motibo di Omicron y su variante cu segun ultimo informacionnan ta mas peligroso cu Omicron original y ta sconde den curpa di hende.
Vacuna ta keda importante den e situacion actual!
