Marc Figaroa, Director:
ORANJESTAD (AAN)—Marc Figaroa, Director di Aruba Port Authority, siguiendo riba e tema di industria crusero den temporada baha, a comenta cu e cantidad di crusero cu ta opera den 'low season' tin di haber tambe cu e grandura di e flota cu e lineanan di crusero tin.
Tin dianan cu e companianan di crusero no tin e mes cantidad di barco y esey ta haci cu nan operacion ta wordo limita, y e ora ey no tin mucho opcion na unda nan ta ubica nan barconan y esey ta trece cierto limitacion pa e cruseronan.
“Tin cierto par di lineanan crusero cu ta creciendo, por ehemplo Norwegian, cu nos ta enfocando awo riba dje pa pusha pa wak si e por bin den low season, pero e tambe ta limita den cantidad di barco. E ta un di e companianan cu tin mas flota cu ta bay crece den e añanan venidero, y eynan nos ta buscando ki nos por haya di nan pa nan por bin den 'low season' tambe”, director di APA señor Figaroa a señala.
Tambe APA ta enfoca aworaki riba Yacht Collection, cu ta esun di Ritz Carlton y si tur cos bay bon, na Februari Aruba por ricibi Four Season tambe, di mesun concepto y cu tambe tin interes pa bin Aruba.
“Y nos tin otro par di lineanan crusero cu ta hopi interesa pa Aruba. Nos tin cu tene na consideracion cu nos tambe tin cu duna e servicio ey bek, unda nan tin un expectativa diferente cu nos cruseronan regular”, Figaroa ta bisa.
El a indica cu e servicio cu Aruba tin cu brinda nan no ta unicamente riba waf of den hotel, pero en general mester sa con pa acomoda nan tambe.
