ORANJESTAD (AAN) — Cu Mike y AVP ta den un situacion di desesperacion, no merece splica Pueblo di Aruba mas. Con critico e situacion di Mike Eman ta, a bini dilanti den un acto cu atrobe a
bira un bochorno y berguensa pa Aruba.
Despues cu na 2017 el a huy pa su responsabilidad pa drecha e desastre cu el a laga atras, Diabierna Mike tabata a bolbe den pantaya den un cuadro cu ta confirma e miedo di tanto Arubiano, cu Mike atrobe kier uza Pueblo di Aruba pa e por hunga rey den un circo peligroso manera el a haci di 2009 pa 2017.
Cu Mike ta un manipulado politico Aruba a comprende for di 2017 ora Mike a bandona scenario na careda despues di un derota na urna electoral.
Pa Mike, obsesiona cu e idea cu e mester ta Prome Ministro di Aruba, entrega di lista di AVP mester a bira su show pa e haci su entrada “triunfal” atrobe.
Historia politico a duna prueba cu esaki ta tur loke Mike por mira. Con e por uza y transforma si ta necesario, historia politico di Aruba y pueblo di Aruba, pa e alcansa su proposito cu ta un posicion maximo den cual e por saca potret tur dia, biaha rond mundo, gasta placa cu e mes no ta traha pa cobra pasobra si ta na un empresa el a traha di 2009 pqa 2017, nan lo a mande cas y Hues.
For di inicio di 2020, un lucha Gobierno Wever-Croes, Pueblo di Aruba, autoridad di Aruba, sector di cuido medico y Reino Hulandes a hiba pa scapa bida di Arubianonan, cu den su prome salida Mike a pone na peliger!
Bida di pashentnan cu cancer y otro gruponan di riesgo y finalmente henter comunidad, mester a wordo proteha.
Tristo di henter e asunto aki tabata tambe cu tin un dokter riba lista di AVP cu ta trata na kibra e logro di Aruba den e lucha contra Covid-19 pero no a stop AVP di habri caminda pa Covid-19 plama.
Tur politico y partido a respeta e reglanan pa evita cu Covid-19 lo a plama na Aruba pero Mike a demostra cu ni ley, ni regla, ni bida di hende tin balor pa su persona.
Den mes rosea Mike a mustra Pueblo di Aruba tambe cu e no a nace pa ta lider y cu e ta un lider capaz pa goberna un pais.
Tristo tabata e splicacion cu Mike a duna pa e circo cu el a monta pa entrega di lista, cu el a logra termina te na ultimo momento pasobra kier of no kier, e no por a laga Benny Sevinger afo.
E rapport Bo Aruba ta duna un bon indicacion di con bon e relacion entre Benny y Mike tabata ora mester a gasta placa di Pueblo.
Diabierna Mike a kibra e esfuersonan di Aruba pa scapa bida di Arubianonan ora el a yuda su sostenedonan viola ley di emergencia y Mike a haci bofon di reglanan pa despues acusa e Pueblo di Aruba di ta iresponsabel pasobra segun Mike ta emocion ta dicidi pa Pueblo di Aruba.
Un emocion den cual sigur e kier landa cu su sunchi di Hudas y falsificacion di historia di Aruba y indice di traicion politico di e pais.
Mike no a contesta pakico ta su partido so tin problema cu responsabilidad y emocion y otro partidonan a cumpli cu regla.
Mike a bisa cu e no por domina su partido, loke ta nifica cu e no por fungi como lider cu den peliger y sigur den un situacion cu AVP mes a yeda keinta for di mainta, no por controla su hendenan.
Si Mike no por controla su grupito di sostenedonan, con e por controla poblacion di Aruba? Ta free for all cu fiesta riba lomba di Aruba por spera?
Mal ehempel a wordo duna na un comunidad, cu a trata di splica hasta pashentnan di cancer con peligroso eleccion y Covid-19 ta manera a keda demostra na otro paisnan den Reino mes y rond mundo.
Abusado, ta e palabra cu cual mester atende cu Mike Eman, cu kier bolbe cu su circo, ta lastra nomber di Conseho Electoral, ta pone Polis na careda pa e hunga rey.
Awe e mes ta pone pueblo comprende cuanto Arubiano lo por a muri si Pueblo tabata na man di Mike den e pandemia di Covid-19.
Tristo pa scucha e homber cu kier otro chens pa sigui destrui Aruba bisa, cu si mester paga boet miembronan di AVP lo haci esaki y asina afirma cu su partido a viola ley cu mester scapa bida di Arubianonan!
