ORANJESTAD (AAN) — Eleccionnan 2021 lo bira e experencia democratico mas importante den historia di pais Aruba y hasta supera e peso di introduccion di Status Aparte den un situacion di caida
economico inespera na 1986.
Kico ta spera Aruba ta depende di e calidad di Gobierno cu Aruba ta eligi durante proximo eleccion cu no solamente ta habri un periodo di gobernacion constitucional, pero ta decisivo pa con Aruba sobrevivi un pandemia den un mundo cu mester di un recuperacion comparabel cu e situacion internacional despues di Segunda Guera Mundial.
Futuro di Aruba ta depende for di e bon maneho economico y financiero di e pais, cu mester produci y duna bon uzo na placa di Aruba, cu ta necesario pa un revision total di Salubridad Publico, cu ta mucho mas cu solamente cuido medico.
E pandemia di Covid-19 basa riba un malesa sigur mester di bon cuido medico, cu no ta e totalidad di Salud Publico cu ta mishi cu tur loke ta afecta e bida di ciudadanonan.
Salud Publico mester di conocemento di profesionalnan riba nan tereno den Cuido Medico pa ehecuta e trabounan directo di atende enfermedad cu mester wordo sigura pa medio di e maneho di Salud Publico cu ta depende directamente di e bon maneho financiero y economico di e pais.
Ora papia di Salud Publico ta papia di expertonan cu ta administra e base di Salud Publico, e infrastructura total.
Despues di a entrega listanan di candidatonan pa proximo eleccion, partidonan politico awor mester splica Pueblo con nan ta bay ehecuta e trabounan necesario den e temponan venidero pa Aruba por subi un caminda completamente nobo, cu ta di acuerdo cu e recuperacion mundial di e pandemia.
Cifranan y rapportnan oficial ta mustra riba e tendencia cu a wordo hiba door di Gobierno Mike Eman di 2009-2017 cu segun instancianan oficial no tabata atende cu e infrastructura ni tabata haci estudionan necesario pa tuma decisionnan cu a mishi cu bienestar di e pais.
Ehempel ta e hecho cu Aruba a haya un hospital renoba, pero e forma cu a haci esaki a laga atras debenan incalculabel pa e pais como parti di e maneho total financiero y economico di Gobierno Mike Eman.
E peso di gastonan di hospital, cu ta refleha den e placa cu AZV mester paga entre otro, tabata parti di e maneho cu resultado negativo riba tereno financiero y economico di Aruba door di Gobierno Mike Eman.
E cambio di maneho financiero y economico di Gobierno Wever-Croes a produci e placa cu Aruba tabata tin mester pa hiba un maneho cu tabata pone balansa exigi entre gasto y entrada manera e presupuesto 2020 a duna prueba.
Pero no tabata tin reserva cu ta uno di e exigencianan mas grandi pa un gobernacion pa por atende cu Salud Publico, cu mester por enfrenta calamidad di tur indole cu un base financiero solido pa asina por haci e gastonan cu cuido medico ta exigi na un pais desaroya.
Pa por enfrenta e exigencianan di comunidadnan, manera DIARIO ta splica den edicion di awe, Aruba mester di un bon economia cu nos a mira den e Masterplan di Gobierno Wever-Croes cu ta atende cu e infrastructura financiero y economico di Aruba.
Factornan cu ta determina e base di Salud Publico na un pais, ademas di facilidad di Cuido Medico na Hospital of pafo di Hospital, un bon maneho financiero y economico cu ta haci cu e ciudadano por come bon, paga awa y electricidad, biba den un ambiente higienico, educa su mes y preveni malesanan entre otro.
E proyectonan di Gobierno Wever-Croes pa activa economia cu a wordo destrui dor di Cigo y pa Aruba haya entrada pa por cubri su gastonan, ta e base directo pa e bienestar di e poblacion cu profesionalnan den Maneho y Planificacion di Salud Publico mester duna contenido como base di bienestar di un comunidad den bon y mal tempo.
A base di factornan concreto, mester splica Aruba cu eleccion 2021 ta dicidi si Aruba ta sigui recupera a base di e maneho realistico cu a wordo hiba y cu Reino Hulandes a confirma, of cu Aruba ta bolbe cay den un abismo di falta di maneho responsabel riba tereno economico y financiero.
