ORANJESTAD(AAN)— Ta cu hopi atencion DIARIO ta sigui desaroyo di e caso di tereno pero tambe e rapport di Refineria di Aruba cu a yega Ministerio Publico cu por lo pronto no por reclama, cu e
no tin nada pa lesa.
Integridad di Aruba ta den wega di casonan den cual gobernantenan di e pais ta wordo menciona na un momento cu e pais mester recupera y atrae companianan pa inverti den su economia.
DIARIO awe kier tira lus riba aspectonan cu ta salta na bista ora repasa informacionnan den e desaroyonan lamentabel.
Na prome luga nos mester a tuma nota fin di siman pasa, cu Huez Comisario a prolonga “detencion” di tres persona. Nos por papia di tres tipo di “detencion” cu ta e palabra cu nos ta uza tur dia.
Den nos mundo di Ley, sinembargo, tin diferente tipo di estadia di un ciudadano den un cel.
Ora nos lesa informacionnan cu nos a ricibi siman pasa y en corto nos a ofrece na nos lectornan, lo por deduci cu e sospechoso Leoncita A, lo mester keda segun e decision di Diabierna 60 dia mas deteni.
Aparentemente e decision di Hues Comisarario ta basa riba “gevangenhouding” segun informantenan.
“Gevangenhouding” ta papia di Prison cu ta encarcelamento di un persona pa un cantidad di dia cu lo mester por ta di acuerdo cu un castigo cu Hues lo por impone si e caso yega asina leu cu e persona ta aparece dilanti mesa berde.
Na e momentonan aki tin otro tipo di sospechoso di e caso tereno cu ta Franklin A. cu lo mester keda dos bes 8 dia den “bewaring” di autoridad, segun nos informacionnan.
Idioma legal conoce bewaring cu ta nifica cu Husticia ta “warda” e persona en cuestion mientras e ta sigui cu su investigacion.
Un “Huis van Bewaring” ta diferente for di un “Prizon” na Hulandes. Un persona no ta preso, loke si ta e caso si papia di “Gevangenhouding”.
Mientrastanto Peter S ta den “inverzekeringstelling” kier meen cu autoridad a sigura nan mes presencia di Peter S. pa investigacion durante ocho dia.
Siman a cera pues cu tres tipo di detenido den e caso Avestruz a base di decision di Huez Comisario pero tambe e informacion di Ministerio Publico cu autoridad penal a ricibi e rapport di e comision cu a realisa un investigacion forensico di loke a pasa na Refineria di Aruba y den cual rapport sigur e nomber di Mike De Meza ta bini dilanti.
Ministerio Publico a informa cu e lo studia e rapport pa mira si por papia di hecho castigabel.
Ta durante fin di siman, Mike Eman como lider di AVP y Prome Ministro den e tempo cu a casonan di tereno segun acusacion a tuma luga, a bisa cu e ta sigur cu Benny Sevinger no ta envolvi.
E pregunta cu ta keda habri awor ta, kende Mike Eman lo por pensa cu a firma documentonan den un caso cu Huez Comisario ta tuma decision pisa pa hasta encarcela sospechoso.
Pasobra si tereno a wordo otorga, mester tabata tin un hende cu a otorga tereno y mester tabata un hende cu a actua na nomber di e Gobierno cu Mike Eman tabata presidi.
Mike Eman tabata asina sigur cu Benny Sevinger no a haci nada, cu el a pone e nomber di Benny Sevinger riba su lista di candidato.
Awor di di berdad crimen a wordo comete cu tereno, kende a firma pa kende haya tereno tempo di Gobierno Mike Eman? Un contesta cu tempo lo mester duna.
