Ex-Sindicalista Gregorio Wolff
ORANJESTAD (AAN): E ex-Sindicalista Gregorio Wolff, a indica cu campaña electoral a yega su fin. Otro campaña yen di promesanan cu politiconan ta bay haci, sin duna atencion na e problema mas grandi di Aruba, cual ta nos debenan nacional.
E politiconan cu yen di promesa, pero parce hendenan cu no sa di e debenan haltisimo, acerca hopi no sa kico ta biba bao di trahadornan na Aruba y con e situacion financiero di nos pais ta.
Lucha sindical: Un otro observacion cu mi ta haci ta, tocante varios politiconan hoben, kendenan a subi lista pa den futuro nan ta bira lidernan politico respeta. Nos por wak cu nan ta inteligente, tin briyo y sigur nan ta mustra balente, pero bisto ta e falta di conocimento y experiencia.
“Mi conseho na e grupo aki, bay siña y tuma mas aprendisahe pa despues resalta den mundo politico. Pa mi persona e mihor school pa un futuro politico ta e lucha sindical.”
Bo ta yuda trahadornan bay dilanti y bo ta forma bo mes ariba terenonan di organisacion, di aspectonan huridico. Bo ta bira profesional ariba con pa dialoga, con pa negocia y mas cu tur bo ta lucha cu bo pueblo pa bay dilanti. Despues di añanan bo tin un carga bunita di experienca cu pueblo, cual sigur lo bay sirbi y haci bo un profesional den e lucha politico.
Tambe e lo ta un ayudo grandi na e lucha di trahadornan, pa yuda engrandece e lucha sindical, cual awendia ta pasando den mal momentonan. Nos falta di lidernan sindical bon prepara y kendenan ta dispuesto pa eleva e lucha di trahadornan.
Sindicato semper tabata dilanti den e peleanan pa un mihor bida di e ser humano. Tambe den e lucha pa e tan anhela igualdad.
Nos mester construi y fortalece e poder di trahadornan. Esaki sigur nos por logra atraves di sindicatonan fuerte, democratico y cu ta hinca nan mes den politica nacional na defensa di trahadornan. Trahadornan ta importante pa nos sociedad funciona correctamente.
Wolff a indica cu ta su deseo cu parti grandi di pueblo ta bay vota. E ta un derecho cu tur tin den un pais democratico. Pues bay vota. Ta su deseo tambe cu tur hende ta vota concientemente a base di un escohencia corecto, sin menasa y sin cumpramento di voto. Tambe pa e mihor partidonan saca nan asientonan y despues forma un gobierno pa dirigi Aruba for di 2025 pa 2028.
