FAVI contento y gradici cu un tremendo y exitoso Bazaar di Pasco

Catherine Midi, coordinador di evento:

ORANJESTAD (AAN) – Manera ta conoci, Diahuebs 5 di December ultimo, FAVI a habri su porta pa pueblo drenta admira su tremendo Bazaar di Pasco, y tambe colabora cumprando algun obranan di man bunita, di locual e clientenan mes a traha, cu ayuda di nan boluntarionan.

            Catherine Midi, Coordinadora di actividadnan na FAVI, a comenta den entrevista cu DIARIO, cu alumnonan di Conrado Coronel a bishita FAVI y a cumpra articulonan.

Nan cushina tabata con surti cu pastechi, nan delicioso sop’i carne, bolo, pica, entre otro, danki na tur e lugarnan cu a yuda FAVI cu donacion.

            Señora Katherine a describi e dia como uno hopi exitoso. Hasta tabata tin rifa di kerstboom, danki na  señor Anthony, cu a yuda e institucion cu esakinan.

            Cu e fondonan recauda, otro siman dia 12, FAVI lo celebra Pasco cu su clientenan, personal, y boluntarionan. Otro siman FAVI ta clausura aña 2024 di e siguiente manera: cu su grupo di gym, cu ta tuma lugar tur diamars; diaranzon cu su grupo di type les-computer, y diahuebs cu su grupo grandi, cu ta bin normalmente.

            Señora Midi a expresa cu tur cliente ta bon bini riba Diahuebs otro siman, pa tur hunto cera aña. Finalmente e dama a gradici tur sponsor cu a haci donacion di coi dushi. FAVI lo habri bek dia 7 di Januari 2025. Lo cuminza cu e grupo di Gym y despues lo tin un actividad grandi pa habri aña cu e clientenan.