Specialmente e parti cu ta bay trece clima negativo pa inversion
ORANJESTAD (AAN): E speranza di Asociacion AHATA, ta cu Parlamento di Aruba lo bay studia e ley di e Plan di Impuesto 2022 hopi bon y extensivamente, prome cu nan djis yega y aproba esaki.
Esey ta loke Tisa LaSorte di AHATA a indica. “E cambionan di impuesto cu Gobierno ta planeando, nos tin speranza cu Parlamento lo haci su huiswerk prome cu nan djis aproba e ley ey, y pa nan compronde e consecuencia di e cambionan cu ta bin,” e CEO di AHATA a bisa.
“Nos ta compronde cu mester haci algo, y nos ta compronde cu tin presion, pa por tin un presupuesto na 2023 cu tin surplus... nos ta compronde esey, pero loke nos kier ta pa tin e claridad di cual tipo di cambio bo ta haci pa si esey tin efecto negativo,” LaSorte a indica.
“Loke nos ta preocupa cune ta cu enberdad ta bay haci Aruba mas caro pa turista y pa local, pero e problema di mas grandi ta cu bo ta haci e pais como producto turistico mas caro, pero di otro banda no ta yudando e clima di inversion.” El a enfatiza: “Loke ta pasa ta cu hopi di e medidanan, manera por ehemplo e medida cu ta limita e deduccion cu bo por haci di bo propiedad inmobil, ta uno hopi extremo y cu ta haci cambio hopi grandi na e situacion financiero di compania.”
LaSorte a yama esey: “Cambia bo clima di inversion, y bo ta core cu inversionista.” El a agrega cu ora bo core cu inversion, loke bo ta haci tambe ta cu bo producto e ora ta bira menos bon, pasobra bo ta stop tur renobacion y keda sin haci bo producto mihor.
“Pues e ora loke ta pasa, ta cu mientras bo ta haci e producto mas caro, pero ta limita e posibilidad pa e producto ta keda di bon calidad. Esey e ora ta bira e problema!”
Tisa LaSorte a mustra cu e ora bo lo cuminza papia di un ‘Clima di Inversion Negativo’, unda cu bo no ta inverti, anto esey ta negativo pa bo producto turistico, fuera cu ta papia di hopi tempo caba cu tin scarcedad di trahador. E dos cosnan aki hunto ta pone cu bo no por duna ni un bon producto di calidad, ni un bon servicio, segun e nivel cu bo ta bay pone nos prijsnan na dje.
“E ora loke bo ta haya tambe ta cu si bo prijsnan ta subi demasiado (pasobra ta hisa ‘cost of doing business’ of ta hisa e peso di comunidad y e comerciante), e ora bo ta haya kizas cu hende local of turista ta cumpra menos e ora tambe. E ora toch bo no ta bay haya e entrada cu bo a calcula cu lo bo haya, pasobra bo ta crea un situacion unda hendenan ta bay gasta menos,” LaSorte a bisa.
