Miembronan di Club Kibrahacha a finaliza curso di digitalizacion

ORANJESTAD (AAN): Recientemente Club Kibrahacha a clausura e curso di digitalisacion pa 60+. Na luna di januari Club Kibrahacha a inicia cu e curso di digitalisacion.

   E curso tabata tin un duracion di 11 siman. Na final di e curso a haci entrega di certificado na  tur 20 participante. 

   E proposito di e iniciativa aki a cuminsa como idea pa yuda nos grandinan na Aruba cu ta desea di siña traha cu Internet, manda e-mail, haci uzo di Online Banking, wak recibo di telefoon, coriente y awa online. Nos enfoque ta primordialmente pa asisti nos grandinan unda cu technoligia ta un reto. Alavez nos a duna guia na nos participantenan con pa maneha cu nan smartphone y tablet. Finalmente a clausura e curso cu tips importante di seguridad ora di haci uzo di tecnologia. 

   E curso di digitalisacion di Club Kibrahacha a ser duna den grupo chiquito. E grupo di 20 participante a ser reparti den dos grupo di 10 persona. Asina tambe por a duna assitencia y guia necesario na cada participante. Tecnologia ta un reto pa hopi hende na Aruba. P’esey tambe Club Kibrahacha ta organiza e curso di digitalisacion den grupo chiquito. E concepto aki ta dunando bon resultado.

   E programa a ser dirigi y coordina pa Giannina Subaran. Den e programa Club Kibrahacha a haya sosten tambe di Kimberly Boekhoudt di Setar N.V., WEB Aruba N.V., Elmar N.V., y tambe Edward Erasmus. Club Kibrahacha ta gradici tur cu a aporta voluntariamente na e programa.