Miembronan di AVP den dialogo importante cu Presidente di Eerste y Tweede Kamer

ORANJESTAD (AAN) – Dialuna merdia, Presidente di Parlamento hunto cu lider di fraccion di AVP y cu e resto di delegacion di Parlamento di Aruba,

a tuma parti den un reunion informativo cu e Presidente di Eerste Kamer, Señor Jan Anthonie Bruijn, y e Presidente di Tweede Kamer, Señor Martin Bosma, den un almuerzo formal.

            E delegacion Arubano tabata consisti di e Presidente di Parlamento, Señor Marlon Sneek, hunto cu e lider di fraccion di AVP Señora Jennifer Arends-Reyes y demas lidernan di fraccionnan. E reunion a sirbi como un plataforma esencial pa fortalece e laso di dialogo entre e partnernan den Reino Hulandes y pa pone na atencion temanan di gran peso politico.

            Durante e encuentro, tabatin hopi enfasis riba e tema di e futuro Rijkswet, un ley cu, manera ta conoci, lo mester pasa eventualmente den Eerste y Tweede Kamer.

            A destaca tambe e desaroyo constante cu Aruba a logra na e ultimo añanan, pasando for di un economia dependiente di refineria pa un base diversifica sostene riba turismo y otro sector clave. Tambe a toca temanan manera Labor y Enseñansa. Ta enfatisa cu Aruba ta desea un relacion di respet mutuo y igualdad, basa riba transparencia y comprondemento.

            E reunion, cu ta e prome di su tipo for di 2019, a desaroya den un ambiente constructivo y positivamente diferente compara cu encuentro anterior. Segun Señor Sneek, tabatin mas apetit pa dialogo abiertamente y sinceramente. E delegacion di AVP a keda satisfecho cu e manera den cual nan a por contribui activamente na e intercambio. Nos ta re- afirma nos compromiso cu un Reino den cual tur partnernan lo mester trata otro cu dignidad y igualdad, y lo sigui busca espacio pa dialogo structural cu y pa e bienestar di pueblo Arubano.