Miembronan di ATSA a haya un actualisacion riba e 'Exit Strategy' y e proyectonan pa 2022

ORANJESTAD  (AAN):  Diahuebs merdia Minister di Turismo y Salud Publico Sr. Dangui Oduber tabata presente na La Cabana Beach Resort

caminda e tabata tin un encuentro cu e miembronan di Aruba Time Share Association (ATSA).

            Den e encuentro aki Minister Oduber a gradici e miembronan di ATSA pa tur e bon trabou cu nan ta haci pa e industria turistico y tambe refleha riba tur locual Aruba su turismo a pasa aden den aña 2020 y 2021. Tambe e mandatario a elabora riba e “Exit Strategy” y e proyectonan cu tin proyecta pa cuminsa e aña aki, dunando un splicacion amplio na tur e miembronan. 

Exit Strategy

1. Cuminsa habri e discusion di bay pa por declara e virus aki endemico.

E virus a muteer hopi y e ultimo variante ta menos fuerte. Ta pesey tambe mester considera declara e pandemia endemico. 

2. Expande e capacidad di ICU

Semper tabata papia di expande e ICU unit y tambe tin mas personal di nos mes. Hulanda a yuda Aruba durante e pandemia cu personal di “AMI Expeditionaly Healthcare”, cual ta personalnan hopi costoso. Awor riba propio forza kier expande nos capacidad na ICU. 

3. Elimina Covid Insurance

Elimina seguro obligatorio na airport y introduci un heffing cu lo ta specialmente pa genera entrada pa inverti bek den cuido. 

4. Lo bay cambia e maneho di testing na airport y tambe e maneho di testing pa localnan.

Pa e turista ya caba a flexibilisa e maneho di ingreso caminda desde 18 di januari a cuminsa acepta Anti Gen testing cu ta mas economico y a cambia e PCR testing di 24 pa 48 ora prome cu e vuelo pa Aruba.

Pa e localnan lo bay cambia e manera di test debi cu e manera actual ya no ta dunando e efectividad y e no ta sostenibel mas mirando cu e variante aki ta mucho mas contagioso. Ta bay introduci un maneho di test nobo cu ta e sentinel testing. Esaki ta nifica cu dokternan di cas ta bay haci invitacion selectivo na diferente persona pa bin haci test pa haya un indicacion con e virus ta plamando den comunidad.

5. Ta bay reenforza Departamento di Salud Publico. 

6. Lo sigui focus riba booster y vacuna.

E vacuna a duna resultado cu nos tabata buscando y pesey lo bay sigui recomenda esaki. Minister Oduber a recorda comunidad cu durante e peak den e di 4 ola tabata tin 116 persona interna den hospital y 82% di esnan interna NO tabata ta vacuna. 

Proyectonan pa 2022

            Minister Oduber a comparti algun noticia hopi positivo pa e turismo di Aruba den forma di proyectonan cu sea ta andando y/of ta planea pa cuminsa e aña aki na e miembronan di ATSA. Tur e proyectonan aki ta wordo haci cu fondonan sea di ATA of TPEF of den combinacion.

• Tin e proyecto di dragamento cu ta andando den nos waf caminda a haci un inversion di 1.6 miyon florin. E proyecto aki ta bay haci posibel pa Aruba por acomoda e mega cruseronan den nos waf.
• Tin e master plan di Colony cu ta ensera e embeyecimento di Baby Beach y e extencion di Rodgers Beach.
• Tin e proyecto di “Mountain Bike Trail” cu lo ta den Parke Arikok.
• Ta bay habri rutanan nobo directamente for di Austin, Texas y tambe for di London, Inglatera.
• Proyecto di restoracion di Fort Zoutman.
• Proyecto di embeyecimento di Eagle Beach.
• Proyecto di Hooiberg caminda lo bay embeyece e trapinan cu mosaic y tambe lo bay construi un mirador na e punta ariba Hooiberg.
• Proyecto di “waste management” di TPEF caminda ta cambia tur e barinan pa barinan special pa sortimento di sushi pa reciclahe.
• Proyecto di Malmok Boardwalk fase 3.

            Finalmente Minister Dangui Oduber a bolbe gradici e miembronan di ATSA pa e bon cooperacion cu nan a duna Gobierno di Aruba durante henter e pandemia.

            Minister Oduber ta spera di por a inspira confiansa den e miembronan pa cu e futuro nos dilanti den e era nobo cu ta bay bin, e era despues di e pandemia.