ORANJESTAD (AAN): Departamento di Impuesto (DIMP) a tene su prome sesionnan cu varios “Stakeholder”
e siman aki den cuadro di Reforma Fiscal 2023, cu un base amplio di gremionan presente.
E obhetivo di e encuentronan tabata pa presenta e contexto di e situacion economico/financiero actual y con por pone un fundeshi solido pa resolve esaki a largo plaso segun e acuerdonan di e Pakete Nacional (Landspakket).
E prome fasenan di e reunionnan aki a cubri e situacion actual, un analisis financiero, e obhetivonan di e reforma fiscal 2023, aprobacionnan di parti di gobierno y finalmente e “roadmap” y e concepto di reforma.
Un sistema di belasting mas moderno
Departamento di Impuesto a realisa un Sentiment Report caminda cu a midi e sentimentonan di e “Stakeholders” invita pa cu e cambionan den nos sistema di impuesto. Den esaki a haya preguntanan riba kico e comerciantenan por spera pa locual ta Reforma Fiscal 2023. Di tur reaccion inicial, a conclui cu tur hende kier un sistema di belasting mas moderno, teniendo na cuenta tambe e bienestar general di nos comunidad, e impacto economico como tambe e necesidad pa informacion y discusion. Locual ta bini dilanti generalmente ta participacion den e diseño y implementacion di un reforma fiscal, percurando tambe pa implementa esaki na un manera exitoso.
A delibera riba diferente punto den agenda
Manera a wordo comunica anteriormente, gremionan y Departamento di Impuesto ta di acuerdo cu mehoracion di cumplimento ta di sumo importancia den nos comunidad. Ta remarcabel cu cada asociacion of “stakeholder” tin diferente bista of opinion riba e reforma segun nan sector of specialisacion, pero ta di opinion cu e reformanan lo mester bay man den man cu bahamento di gasto di operacion di gobierno.
Stakeholders ta desea di mira e cuadro total y no solamente e cambionan proponi riba tereno di impuesto. Tur e puntonan aki ta puntonan valido cu ta wordo tuma na cuenta segun DIMP y a sigura e gremionan cu lo tin espacio pa un sesion riba e tereno aki tambe.
“E informacion aki ta crucial pa evalua e concepto actual y haci ahustenan necesario den bienestar general di nos pais,” Luenne Gomez-Pieters, Director di Departamento di Impuesto ta expresa. Comprendemento di e diferencia entre un sistema di BBO y BTW tabata un di e puntonan riba agenda, pero tambe compensacion di impuesto pa cada contribuyente riba tereno di inkomstenbelasting, loonbelasting, reparatietoeslag, onderstand y bijstand a wordo bon ricibi door di e participantenan.
Adicionalmente, preocupacionnan di e impacto di un sistema di BTW riba elasticidad di consumo turistico a wordo presenta constructivamente, caminda cu Aruba lo mester tene cuenta cu factornan externo cu por afecta e poder di compra, mirando cu nos ta importa mayoria di nos productonan.
Introduccion di BTW lo mester wordo mira den lus di e desaroyonan internacional.
“Breakout sessions”
Tur “stakeholder” cu a expresa nan deseo di sigui delibera riba e conceptonan di reforma, lo wordo invita bek pa un segundo encuentro yama “Breakout session”.
Departamento di Impuesto ta percura pa procesa tur feedback ricibi y presenta e diferente ideanan y calculonan di e reforma fiscal durante e sesionnan aki.
Departamento di Impuesto y su team di experto fiscal ta reitera cu e reforma fiscal presenta durante e encuentronan aki ta conceptual y ta suheto na evaluacion di contribucion di gremio y di henter comunidad.
