El a lanta y critica duro abogado mr. Ruiz cu a yama su yiunan “zware jongens”
ORANJESTAD (AAN): Dialuna for di 8.30’ di mainta te den careda di 2’or di merdia, Hues di Corte den Promer Instancia a dedica na trata e caso penal cu Ministerio Publico a cuminsa contra e dos yiunan homber di Michael Williams, N.W. y D.A.W. y e yiu homber di Promer Minister Wever Croes, K.W. y e swa di K.W., esta sospechoso T.M.
E cuater sospechosonan ta worde acusa cu riba 14 November 2021 a causa violencia publico den Azia Restaurant na Palm Beach, caminda a destrui un cantidad di glas y tambe a herida un chef cook severamente na su man drechi.
Michael Williams saca for di Corte: Den oranan di merdia, despues cu Fiscal a exigi castigo pa e cuater sospechosonan, a toca turno pa e abogadonan hiba defensa.
Por a constata cu K.W. a bin cu tres abogado, esta mr. Reinkemeyer y mr. Ruiz cu a hiba palabra y un otro mas cu ta di e mesun oficina tabata asisti.
Despues cu mr. Reinkemeyer a hiba parti di defensa pa K.W., mr. Ruiz a sigui. El a bisa Hues cu e dos rumannan N.W. y D.A.W., ta worde considera como “zware jongen”. E abogado a cuminsa pinta e rumannan scur y cu su cliente K.W. a actua den defensa propio. Esaki no a cay den bon tera cerca e rumannan, e tata Michael Williams y abogado mr. Rozenstand cu ta e abogado di D.A.W.
Yiunan a menaza Abogado: E rumannan a reacciona riba e mencion di “zware jongens”. Nan a expresa “bo ta bay haya den hende”. Na dado momento abogado mr. Rozenstand a lanta para y bisa Hues cu e ta protesta contra e forma con mr. Ruiz ta tira acusacionnan riba su cliente.
E situacion a bira tenso den sala di Corte. E rumannan W. a keda halza voz den sala contra mr. Ruiz cu tabata papiando. Na dado momento Hues a bisa e rumannan W. pa keda keto. Esaki tabata momento cu a scucha un sonido duro. Michael Williams a lanta para y dal su man duro riba e mesa di abogado y expresa cu mester para mr. Ruiz.
Michael Williams a menaza Abogado: Di biaha por a mira e miembronan di CEA, hunto cu agentenan di Polis cu e momento ey a presenta den sala di Corte, gara Michael Williams y hib’e pafor di edificio di Corte.
Mientras cu nan tabata sacando Michael Williams, caminda mester a pasa banda mr. Ruiz, el a expresa den voz halto na mr. Ruiz, “wak bo caya”.
Ta asina cu mr. Ruiz a sinti su mes amenaza pa e expresionnan di e yiunan y tambe Michael Williams. El a pidi Hues pa haci anotacion di e menazanan den e relato di caso di Corte.
Despues e tratamento a sigui y Hues a sera tratamento di e caso y dia 21 April 2023 lo tin sentencia.
