Prome Minister Evelyn Wever-Croes:
ORANJESTAD (AAN): Dialuna mainta via medionan social, Prome Minister Evelyn Wever-Croes a tuma nota di un noticia cu oponentenan a saca, informando pueblo cu 3 minister di Gabinete Wever-Croes lo ta sacando auto nobo. Prome Minister a afirma cu e noticia aki ta uno completamente falso y ta pa desvia e atencion di pueblo for di e bon noticia di e firmamento di e "onderlinge regeling".
Prome Minister a splica cu na momento cu su persona a drenta Gobierno 5 aña pasa, el a haya un auto cu te awe ta sirbi e necisidadnan cu su cargo ta rekeri, y no ta wak niun motibo pa cambi’e. Alcontrario di e Prome Minister anterior, señor Mike Eman cu tabata tin 3 auto den su presupuesto di cual un di nan tabata tin un sticker grandi di AVP riba dje. Esaki, segun Prome Minister, ta bagamunderianan cu a tuma luga den e gobernacion di AVP y a wordo para asina cu Gabinete Wever-Croes a cuminsa goberna.
“Mi a ricibi varios yamada den fin di siman pa adverti mi cu oponentenan lo lanta dialuna mainta cu acusacionnan contra mi persona. Esaki sigur tabata di spera, mirando cu e siman aki ta un hopi importante pa pais Aruba. E firmamento di e "onderlinge regeling" na unda ta baha e COHO for di mesa, ta un logro grandi pa Aruba. Esaki sigur no ta combini oponentenan y p’esey nan ta prefera di bin cu noticianan falso pa crea discordia y desvia e atencion di pueblo for di e noticia cu si ta positivo y beneficioso pa pais Aruba”, Prome Minister a enfatisa.
Oponentenan tambe a bin dilanti bisa cu nan a papia cu ex Secretario di Estado, Raymond Knops. Prome Minister tambe a papia cu señor Knops kende a gradici’e y felicit’e pa cu e logro aki mirando cu e areglo aki di e "onderlonge regeling" ta hopi mas benificioso pa pais Aruba cu esun cu señor Knops a bin cu ne anteriormente.
"Ta importante si pa acusacionnan asina wordo aclarea cu e berdad. Mi kier laga comunidad sa cu e noticia aki, cu oponentenan a trece den medionan social, ta completamente falso. Mi ta lamenta cu oponentenan ta busca forma barata asina, pa purba na sobrepasa e bon noticia cu ta asina importante pa Aruba. Nos den Gobierno a custuma caba di ricibi acusacionnan baho y falso di oponente y ta scoge pa concentra riba e cosnan positivo y no laga nada kibra nos", Prome Minister a expresa.
