Michael Lampe ta fortalece relacion Diplomatico y Cultural di Aruba cu Hulanda na Dutch Culture

ORANJESTAD (AAN): Michael Lampe, Diplomatico Cultural di Aruba y Representante Special pa Diplomacia Cultural,

a haci un bishita official na e organizacion pa Relacionan Internacional di Cultura, Dutch Culture na Amsterdam pa un reunion cu Directora Drs. Kirsten van den Hul. E reunion aki ta representa un paso importante pa fortalece diplomacia cultural entre Aruba y Hulanda.

  E reunion a concentra riba diaspora, intercambio cultural y cooperacion internacional como pilar central di e strategia di diplomacia cultural di Aruba. Tambe a explora oportunidadnan pa colaboracion pa industria creativo y visibilidad internacional pa nos voznan cultural di Aruba y Caribe.

  Durante e bishita, Directora Drs. Kirsten van den Hul di Dutch Culture a felicita  Sr. Lampe den su rol nobo, y a expresa su alegria di mira Aruba tuma e paso importante aki:

   “Nos ta contento di mira Michael Lampe den e rol aki y nos ta felicite.

    Fortalece diplomacia cultural entre Aruba y Hulanda ta esencial, y nos ta contento pa traha hunto cu Michael den su rol nobo” segun Directora Drs. Kirsten van den Hul di Dutch Culture.

   Sr. Lampe a enfatisa cu diplomacia cultural di Aruba ta e brug entre islanan, diaspora y partnernan internacional.

   “Cu orguyo mi por bisa cu nos cultura tin un balor inmenso y pa medio di fortalece partnernan cu Organizacionan importante manera DutchCulture, nos ta mustra cu Aruba ta un isla chikito cu por contribui na innovacion, resiliencia y formacion di identidad den area di cultura riba un scenario mundial,” Lampe a bisa.