Francis Gomez di DOW:
ORANJESTAD (AAN): Por a ripara cu tin algun caretera rond di Aruba cu ta hayando un capa di asfalt y pa esaki Departamento di Obranan Publico (DOW) ta uzando un producto nobo. Francis Gomez, Hefe di Afdeling di Diseňo y Planeamento a duna di conoce cu CIC NV ta bezig cu e parti di mantencion preventivo cu e metodo di micropaving riba Green Corridor.
El a splica cu na februari a cuminsa ‘stock’ material y ekiponan banda di Drive-In y na maart a cuminsa cu e prome testnan na e caminda di Weg Seroe Blanco band’i rotonde di Weg Fontain.
Gomez a agrega cu e trabaonan a sigui cana nan caminda y den e periodo di vakantie grandi a tuma e oportunidad pa haci e trabaonan riba e camindanan principal ya cu tabatin menos trafico.
E trabaonan lo mester a caba prome cu scol cuminsa yegando Scol Graf Von Zinzendorf y cu esey ta termina e trabaonan cu ta tumando lugar na e caminda principal aki.
Despues di esaki e trabaonan di micropaving lo bay sigui den e area di Savaneta pa asina por termina cu e parti di e trabaonan di mantencion preventivo, Gomez a duna di conoce.
DOW ta hopi interesa den esaki door cu e mes, a bisa, hopi aña pasa a yega di bay Mississippi unda cu tabatin e metodo di micropaving tambe. Sinembargo, pa haci un test piloto e tempo ey ta haci cu e gastonan ta hopi halto. Pero aworaki, conhuntamente cu e proyectonan di PPP (Private Public Partnership), e tipo di metodonan cu ta wordo uza rond mundo ta wordo aplica na Aruba, el a remarca.
Esaki ta algo hopi interesante pasobra por monitoria esaki akinan y wak kico ta funciona pa asina aplic’e den mantencion di e careteranan na Aruba, Francis Gomez di DOW a indica.
