Magaly Brito, Secretaria General di SEPPA:
ORANJESTAD (AAN)—Magaly Brito, Secretaria General di SEPPA (Sindicato Empleadonan Publico y Priva Aruba), a amplia den entrevista cu DIARIO y bisa cu, bon por ta cu ta cumbini Gobierno elimina e tres primanan cu empleadonan publico ta haya, y ta purba hinca den e cabes di empleadonan publico cu esey ta bay caba; pero no ta asina, e primanan a wordo negocia na mesa di e forma aki, cu ta stop di crece pasobra no tin mas porcentahe cu tin cu bin dak ariba dje, pero no cu e ta bay stop di existi.
“E ta bon tambe pa empleadonan publico tuma nota di esaki, pasobra si ta e intencion di e dunador di trabao pa elimina e prima aki, anto si, apesar di hopi yamada cu nos a haci, e empleadonan publico lo sa di para pa locual nan tin derecho riba dje; lo sa di para pa luchanan cu nos a hiba pa hopi tempo, pa aworaki sin mas, laga esakinan cay”, Magaly Brito a vocifera.
Pa por para e primanan, Brito a bisa cu SEPPA a wak ultimamente cu gobierno ta djis pone un stop y no ta ehecuta, anto eynan e problema ta start. “Ta na e trahador ta keda na dje pa bay lucha pa su derecho, pero nos no ta spera cu gobierno ta bay haci esaki. Al contrario, e ta bay reflexiona bon kico e acuerdo aki ta encera, pa e sigui cumpli cune”, Magaly Brito a señala.
Britto a agrega cu un cos ta no duna mas, otro cos ta bo tin cu pare, y otro cos ta cu e tin un debe cu empleadonan publico. “Ta condicionnan di trabao cu bo tin cu keda cumpli cu nan, y no ta sin mas bo ta yega pare”, Magaly Brito a reitera.
Kiermen, empleadonan publico, trahadornan di fundacion, y empresanan estatal a caba di pasa den un momento hopi dificil caba debi na e pandemia, na unda nan a negocia nan salario, cu nan entrada, haci recorte riba esaki, pa aworaki atrobe bay over na tuma medida riba un condicion di trabao cu, como dunador di trabao bo sa cu bo mester cumpli cune”, Magaly Brito a remarca.
Gobierno di Aruba ta un dunador di trabao mescos cu otronan eyfo cu tin cu cumpli cu nan trahadornan; gobierno di Aruba tambe tin cu haci esaki, Brito a reitera.
