Segun Franchesca Heinze, directora:
ORANJESTAD (AAN) – Un hoben of un mucha menor di edad, no por ta sin supervision rond di dje. Segun directora di ATHA (Asociacion Trabao pa Hubentud Aruba), Franchesca Heinze, pesey ta importante pa mayor mes takel e parti aki y den e caso aki refiriendo na e periodo di vacacion grandi.
“Abo mes como mayor, organiza actividad leuk pa bo yiu, pa hobennan mes bin bo cas, por ehemplo. Of si tin omo, famia of amistadnan di confianza cerca, por haci algo leuk pa nan, por ehemplo wega di domino, of otro. Importante ta pa nan ta cerca otro. Pa vacacion grandi pa otro aña, ATHA mes ta bezig ta wak ki oportunidadnan tin pa bin cu mas actividad y con nos por atende cu e parti aki”, Franchesca a comenta.
El a agrega cu ora hobennan ta acerca ATHA cu nan deseo di tin actividad, y nan ta sinti laf. Tin hopi camp ta tumando lugar pero mayoria di nan, na mesun momento y pa periodonan cortico. ATHA kier wak con pa yuda den esaki.
